N36 قالالىق ەمحانانىڭ ۋرولوگى «ەرلەردىڭ دەنساۋلىعى» تۋرالى ايتىپ بەردى
دارىگەرگە كورىنۋ ءۇشىن ۋرولوگيالىق اۋرۋدىڭ بەلگىسى بولماسا دا، ۇنەمى پروفيلاكتيكالىق تەكسەرۋدەن ءوتۋدى قاجەت ەتەتىن تاۋەكەل توبى بار دەيدى ۋرولوگ ابيدبەكوۆ كەمەلبەك مەيىربەك ۇلى.
كوپتەگەن اۋرۋدىڭ بەلگىسى بولمايدى، ءارى ولار ەر ادامدى مۇلدە مازالاماۋى مۇمكىن. اۋرۋدى دەر كەزىندە دياگنوستيكالاۋ جانە ەرتە ەمدەۋ عانا ونى تولىق ەمدەۋگە جانە قارتايعانعا دەيىن ءومىردىڭ بارلىق قىزىعىن كورۋگە مۇمكىندىك بەرەدى.
دەگەنمەن، كوپتەگەن ەر ادام ءوز دەنساۋلىعىنا جەتكىلىكتى نازار اۋدارمايدى جانە اۋىر زارداپقا اكەلەتىن ءبىرقاتار پروبلەمانى ەلەمەيدى.
- تاۋەكەل توبىنداعى نەمەسە ۋرولوگ نە اندرولوگتا ەسەپتە تۇرعان بارلىق ادام جىلىنا كەمىندە ەكى رەت پروفيلاكتيكالىق تەكسەرۋدەن ءوتۋى كەرەك. بۇل پروبلەمانى ەرتە كەزەڭدە انىقتاۋعا جانە قۋىق استى بەزى قاتەرلى ىسىگى دامۋىن بولدىرماۋعا مۇمكىندىك بەرەدى، - دەپ بولىسەدى ا.كەمەلبەك ۇلى.
دارىگەر «ەرلەردىڭ دەنساۋلىعى» قوزعالىسقا، اتاپ ايتقاندا، قان اينالىمى مەن قۋىق استى بەزىندەگى زات الماسۋدىڭ قارقىندىلىعىنا بايلانىستى ەكەنىن اتاپ ءوتتى.
سوندىقتان دارىگەر تۇراقتى جاتتىعۋ جاساۋدى ۇسىنادى. ويتكەنى جامباس بۇلشىقەتىنىڭ جيىرىلۋى بەزگە ماسساجدىق اسەر بەرەدى.
ونىڭ ۇستىنە فيزيكالىق جاتتىعۋ ءىش ىشىندەگى قىسىمدى رەتتەيدى، بۇل ەرلەردىڭ نەسەپ-جىنىس جۇيەسىنە وڭ اسەر ەتەدى.
- «ەرلەردىڭ دەنساۋلىعىن» ساقتاۋدا دۇرىس تاماقتانۋ دا ماڭىزدى ءرول اتقارادى.
- ديەتا كوكونىسكە، جەمىسكە، ءداندى داقىلدارعا، مايسىز اقۋىزدارعا جانە پايدالى مايلارعا باي بولۋى كەرەك.
- ال نيكوتين مەن الكوگولدىڭ زيانى تۋرالى ءبارى بىلەتىن شىعار.
- نيكوتين قان تامىرلارىن تارىلتادى، ومىرلىك ماڭىزدى ورگانداردىڭ تاماقتانۋىن ناشارلاتىپ قانا قويماي، سونىمەن قاتار ەرمۇشەگە قان اعىنىن ازايتادى.
- ال الكوگولدى شامادان تىس تۇتىنۋ ەرلەردىڭ دە، ايەلدەردىڭ دە دەنساۋلىعىنا كەرى اسەر ەتەدى.
قورىتىندىلاي كەلە، ۋرولوگ مامان ەرلەردىڭ دەنساۋلىعىنا وڭ اسەر ەتەتىن تۇراقتى جىنىستىق ءومىر مەن قورعالعان جىنىستىق قاتىناستى اتاپ ءوتتى.
- قولايلى جاقىن قارىم-قاتىناستىڭ بەلگىلى ءبىر جيىلىگىن ساقتاۋ ۇسىنىلادى. رەكورد ورناتۋعا تىرىسۋدىڭ قاجەتى جوق، ءبىراق ۇزاق ءۇزىلىستىڭ دە پايداسى جوق. ەسىڭىزدە بولسىن، تۇراقتى جىنىستىق قاتىناس ەر ادام اعازاسىندا كوپتەگەن توقىراۋدىڭ الدىن الادى جانە قۋىق استى بەزى ماسساجىنان الدەقايدا پايدالى. كەز كەلگەن كۇماندى جىنىستىق قاتىناس دەرەۋ دارىگەرمەن كەڭەسۋ ءۇشىن سەبەپ بولىپ تابىلادى! سيمپتومداردىڭ بولماۋى جاسىرىن جىنىستىق جولمەن بەرىلەتىن ينفەكسيانى جۇقتىرۋدى جوققا شىعارمايدى، ول كەيىننەن وتە اۋىر اۋرۋدىڭ سەبەبى بولۋى مۇمكىن، - دەپ تۇيىندەدى مامان.