قالا اگلومەراسياسىنىڭ ءوسۋى، حالىق سانىنىڭ كوبەيۋى، كوپقاباتتى ۇيلەردىڭ سالىنۋى ءورت قاۋىپسىزدىگى ماسەلەسىن وزەكتى ەتە تۇسەدى.
وسى ورايدا ەلوردالىق مەملەكەتتىك ءورت باقىلاۋ باسقارماسىنىڭ باستىعى ەركىن وتارعالىم ۇلى ءورت ءسوندىرۋ كەزىندەگى كەدەرگىلەر مەن قيىندىقتار تۋرالى ايتىپ بەردى، دەپ حابارلايدى Almaty-akshamy.kz.
سپيكەردىڭ ايتۋىنشا، جالپى ءورت ءسوندىرۋ بارىسىندا وقيعا ورنىنا جەتۋ، جولدىڭ اشىلماۋى، سۋ كوزدەرىنىڭ تاپشىلىعى سەكىلدى كەدەرگىلەر تۋىندايدى.
«بۇگىنگى تاڭدا قالا اۋماعىندا ورتتەردەن قورعاۋ ءۇشىن 12 ءورت ءسوندىرۋ ءبولىمى قىزمەت اتقارادى. نورمالارعا سايكەس، ءورت ءسوندىرۋ قىزمەتىنىڭ شاقىرۋ ورنىنا 10 مينۋتقا دەيىن جەتۋى ءتيىس، الايدا كوپ جاعدايدا اتالعان ۋاقىتقا ۋاقىتىلى حاباردىڭ كەلمەۋى، ءورت ورنىنا بارا جاتقان تەحنيكاعا جول بەرمەۋ، وتكىزبەۋ سەكىلدى بىرنەشە فاكتور اسەر ەتەدى. ۋاقىتىلى كەلگەن ءورت تەحنيكاسى دا كوپقاباتتى ۇيلەردىڭ اۋلاسىنا كىرە الماي جاتادى»، - دەدى ەركىن وتارعالىم ۇلى استانا قالالىق كوممۋنيكاسيالار قىزمەتىندە.
قولدانىستاعى ءورت قاۋىپسىزدىگى ەرەجەلەرىنە سايكەس، ءورت تەحنيكاسىنا ارنالعان جولدار ءارقاشان اشىق جانە جارامدى كۇيدە ۇستالۋى كەرەك. بۇل – ءورت قاۋىپسىزدىگىن قامتاماسىز ەتۋدىڭ اجىراماس بولىگى، دەپ جازدى قازاقپارات.
«بۇگىنگى تاڭدا كوپقاباتتى ءۇي اۋلاسىنا كىرەبەرىستە تەمىردەن، بەتوننان كەدەرگى قويۋ جيىلەدى. مۇندا تۇرعىندار بالالار قاۋىپسىزدىگىن العا تارتىپ، بوتەن كولىك كىرمەۋ كەرەگىن ايتادى. الايدا بۇل ءورت قاۋىپسىزدىگى تالاپتارىنا قايشى كەلەدى. شلاگباۋمداردى قويۋعا شەكتەۋ جوق، الايدا اتالعان شلاگباۋمداردا مىندەتتى تۇردە كۇزەت بولۋى كەرەك، تاۋلىگىنە 24 ساعات جەدەل قىزمەت كولىكتەرىنىڭ وتۋىنە جاعداي جاساۋى شارت. بۇل ەرەجەلەر – شاقىرۋعا كەلە جاتقان ءورت سوندىرۋشىلەر نەمەسە مەديسينا قىزمەتكەرلەرىنىڭ كومەككە ۋاقىتىلى جەتۋىنىڭ بىردەن-بىر كەپىلى»، - دەدى سپيكەر.
اسىرەسە 10 قاباتتان جوعارى تۇرعىن ۇيلەردىڭ ەكى جانىنان بوس جول قاراستىرىلۋى كەرەك. الايدا كولىك قويۋعا بايلانىستى، ارنايى مامانداندىرىلعان ءورت تەحنيكاسى كىرە الماي جاتادى، كىرگەندە دە ادامداردى قۇتقارۋ ءۇشىن تەحنيكا قاناتىن جايا المايدى.
«تاعى ءبىر ماسەلە – تۇرعىندار قۇدىقتار مەن ءورت گيدرانتتارىنىڭ ۇستىنە كولىك قويىپ تاستايدى، قىس مەزگىلىندە مۇزدان، قاردان تازالانباي قالادى. ولارعا باراتىن جولعا ارنايى بەلگى دە قويىلۋى كەرەك. مۇنىڭ بارلىعى ءورت سوندىرۋگە، ادام ومىرىنە اراشا تۇسۋگە كەلگەن قۇتقارۋشىلاردىڭ جۇمىسىنا كەدەرگى كەلتىرەدى. اتالعان ماسەلەلەردى شەشۋ ءۇشىن دەپارتامەنت تەكسەرۋلەر جۇرگىزەدى، پيك، وسي باسشىلارىمەن، تۇرعىندارمەن جيىن وتكىزىپ، ءورت تەحنيكاسىنىڭ ءوتۋى پروبلوەماسىن كوتەرەدى»، - دەدى ە. وتارعالىم ۇلى.
ونىڭ ايتۋىنشا، 2018 جىلعا دەيىن اباتتاندىرۋ ەرەجەلەرىنە سايكەس، كوپقاباتتى ۇيلەردىڭ اۋلالارىندا تەمىر شلاگباۋمداردى، بەتون بلوكتاردى قويۋعا تىيىم سالىنعان بولاتىن. 2018 جىلى اتالعان ەرەجەگە وزگەرىس ەنگىزىلىپ، تارماق الىنىپ تاستالعان.