ەلوردادا ۇلتتىق اكادەميالىق كىتاپحانادا جازۋشى-ساتيريك، قوعام قايراتكەرى كوپەن امىربەكتىڭ «كوپەن كەلە جاتىر!..» اتتى بەس تومدىق شىعارمالار جيناعىنىڭ تۇساۋكەسەرى ءوتتى، دەپ حابارلايدى اlmaty-akshamy.kz اikyn.kz-كە سىلتەمە جاساپ.
شارانىڭ اشىلۋ ءراسىمىن جۋرناليست شارحان قازىعۇل جۇرگىزە وتىرىپ، كوپەن امىربەك جايىنداعى جىلى ەستەلىكتەرىمەن ءبولىستى.
«كوپەن اعانى كوزى تىرىسىندە كورگەنىمدە، ءوزىم اريستوتەلدىڭ باس سۇيەگىن كورگەندەي بولامىن. قولىنا قالام العاندار ساتيريك بولا المايدى. ول وڭاي ەمەس. ساتيريك بولۋ ءۇشىن جارتىلاي فيلوسوف بولۋ، فيلوسوف بولۋ ءۇشىن جارتىلاي ساتيريك بولۋ كەرەك. اقيقاتتىڭ بارلىعى فيلوسوفيادا. سول فيلوسوفيانى، اقيقاتتى ايتۋ ءۇشىن ساتيريك بولۋ مىندەتتى. وسى تۇرعىدان العاندا كوپەن امىربەك قازىرگى زامانعى قازاق ادەبيەتىندە الاتىن ورنى ەرەكشە قالامگەر دەپ ايتۋعا بولادى، – دەدى ول.
ساتيريك كوپەن امىربەك كوزى ءتىرى بولعاندا 73 جاسقا تولار ەدى. قازاقتا «جاقسىنىڭ اتى ولمەيدى، عالىمنىڭ حاتى ولمەيدى» دەگەن ءتامسىل بار. وسى تۇرعىدا جازۋشى-ساتيريك كوپەن امىربەكتىڭ «كوپەن كەلە جاتىر!…» اتتى 5 تومدىق شىعارمالار جيناعىن ءوزى جيناقتاپ، كىتاپتىڭ تۇساۋكەسەرىن جاساماق بولعان. كەلىنشەگى ايگەرىم اسانوۆانىڭ ايتۋىنشا، جيناقتى قالىڭ وقىرمانعا تانىستىرىپ، جەتكىزۋدى امانات دەپ بىلگەن.
– بەس تومدىق جيناق شىقتى دەگەنىن ەستىپ، تاڭدانعانىم راس. ەڭ اۋەلى كوپەكەڭ قاي ۋاقىتتا جازىپ ۇلگەرگەن دەپ ويلادىم. يۋمور بار جەردە ادامنىڭ جاسامپىزدىعى كورىنەدى. وسى تۇرعىدان قاراعاندا، كوپەن امىربەكتىڭ وتكەن عاسىردىڭ 70-80-90 جىلدارىندا قازاق مادەنيەتىنە اتقارعان ءرولى ەلەۋلى. حالقىمىزعا ەجەلدەن ءتان قالجىڭدى، وتكىر ءسوزدى، سىن-سىقاقتى جاڭا ءبىر بيىككە كوتەرگەن. وسپانحاننىڭ داڭقتى ءداستۇرىن جالعاستىرعان جۇلدىزدى ءىزباسارى. كوپەندى انىق مويىنداۋداعى دۇنيە – ونىڭ ەسىمى، – دەدى ساۋىتبەك ابدراحمانوۆ.
كوپەن امىربەك ءار جىلدارى جارىق كورگەن «اتى جوق كىتاپ»، «الىپ»، «ءتىلىم قىشىپ بارادى»، «قىسىر اڭگىمە»، «اۋىزباستىرىق»، «مىڭ ءبىر مىسال»، «نەمەنەڭە جەتىسىپ كۇلەسىڭ؟»، «ءوزىڭدى تانيسىڭ با؟»، «سايداعى قويشىدان سارايداعى پاتشاعا دەيىن»، «كوكەمنىڭ كوزى»، «ءىز»، «پا، شىركىن، پاروديا»، «جۇما سالەم»، «جىگىتتەر جيىنى» اتتى ءازىل-سىقاق، پاروديا كىتابى ارقىلى وقىرماندارعا كەڭىنەن تانىلعان بولاتىن.
ال وسى جولعى جيناق 500 دانامەن شىققان. كىتاپتىڭ ءبىرىنشى تومى ساتيراعا ارنالسا، ەكىنشىسى – كوپەن امىربەكتىڭ سۇحباتتارى جيناقتالىپ، سوڭعى ءبولىمى فوتوالبوم رەتىندە جارىق كورگەن.
– ساتيرا سالاسىندا كوپەن امىربەكتىڭ ورنى دا، اتى دا، ەڭبەگى دە ەرەكشە. 2000 جىلدارى سايلاۋعا كوپەن اعا دا قاتىسقان. جولى بولماي، وتپەدى. سول جاعدايدان كەيىن ءبىر كۇنى كەزدەسىپ قالدىق. ءوزىڭىزدىڭ ءۇنىڭىزدى تانىتىپ، ساتيرا سالاسىندا ەمىن-ەركىن جۇرە بەرمەيسىز بە دەپ جۇباتۋ سوزدەرىن ايتقان ەدىم. سودان كەيىن «كوپەن كەلە جاتىر!..» دەگەن جوبا باستالىپ كەتتى. سول اتپەن، مىنە، حالىققا جاتتالىپ قالدى. ايقىن گازەتىندە «ارا» اتاۋىمەن ارنايى نومەر جازىلىپ كەلە جاتىر. بۇل دا كوپەن اعاعا كورسەتىلگەن قۇرمەت دەپ بىلەمىز،- دەدى سەناتور، پۋبليسيست نۇرتورە ءجۇسىپ.
سونىمەن قاتار، تۇساۋكەسەر راسىمىنە بەردىبەك ساپاربايەۆ، جارىلقاپ بەيسەنباي، دارحان مىڭباي، نۇرتورە ءجۇسىپ، باۋىرجان وماروۆ، ديحان قامزابەك ۇلى جانە باسقا دا بەلگىلى قوعام قايراتكەرلەرى قاتىستى.
ءومىرىنىڭ سوڭعى جىلدارىندا كوپەن امىربەك Aiqyn رەسپۋبليكالىق قوعامدىق-ساياسي گازەتىنىڭ «ارا» قوسىمشاسىندا رەداكتورلىق قىزمەت اتقارعان. گازەتتىڭ اتالمىش قوسىمشاسى ءالى كۇنگە دەيىن تۇراقتى تۇردە شىعىپ تۇر. نەگىزى كوپەن امىربەك بۇعان دەيىن «قازاق ادەبيەتى»، «ەگەمەن قازاقستان» گازەتتەرىندە ساتيرا، فەلەتون ءبولىمىنىڭ مەڭگەرۋشىسى، «ءبىلىم جانە ەڭبەك»، «ارا-شمەل» جۋرنالىندا جاۋاپتى حاتشى، ق ر باس پروكۋراتۋراسى مەن جوعارعى سوتتا باسپا ءسوز حاتشىسى بولىپ ۇزاق جىلدار قىزمەت ىستەگەن.
سونداي-اق «ارا» جۋرنالىنىڭ باس رەداكتورى، قازاق راديوسى ديرەكتورىنىڭ ورىنباسارى، قازاقستان جازۋشىلار وداعى باسقارماسى ساتيرا كەڭەسىنىڭ ءتوراعاسى قىزمەتتەرىن اتقارعان.