تولىق اقپاراتتى 1414 ءنومىرى بويىنشا بىلۋگە بولادى
16 مىڭعا جۋىق قازاقستاندىق كوپبالالى وتباسىلار ءۇشىن تاعايىندالاتىن جاردەماقىنى پرواكتيۆتى فورماتتا الدى، دەپ حابارلايدى Almaty-akshamy.kz قازاقپاراتقا سىلتەمە جاساپ.
وتكەن جىلدىڭ مامىر ايىنان باستاپ ايەلدەرگە ءتورتىنشى نەمەسە ودان دا كەيىنگى بالانى تۋعان كەزدە تاعايىندالاتىن كوپ بالالى وتباسىلار جاردەماقىسىن الۋ ءۇشىن حقكو-عا جۇگىنۋ مىندەتتى ەمەس، مەملەكەتتىڭ ءوزى بارلىعىن قاشىقتان SMS ارقىلى راسىمدەۋدى ۇسىنادى.
بۇدان بۇرىن اتالعان جاردەماقىنى رەسىمدەۋ ءۇشىن حقكو-عا بارىپ، ءوتىنىش جازىپ، جەكە كۋالىك، بالالاردىڭ تۋۋ تۋرالى كۋالىكتەرى مەن نەكە قيۋ كۋالىگى سياقتى قۇجاتتاردى ۇسىنۋ قاجەت ەدى، ال جاردەماقى ءوتىنىش بەرىلگەن كۇننەن باستاپ تاعايىندالاتىن.
«وتباسىندا ءتورتىنشى نەمەسە ودان كەيىن تاعى بالا تۋىلعان جاعدايدا، پرواكتيۆتى تۇردە بالانىڭ تۋۋ تۋرالى كۋالىگىن، بالا تۋۋ مەن ونىڭ ءبىر جاسقا دەيىنگى كۇتىمىنە بايلانىستى بەرىلەتىن جاردەماقىلاردى عانا ەمەس، كوپبالالى وتباسىلار ءۇشىن جاردەماقىنى رەسىمدەۋدى ۇسىناتىن SMS-حابارلاما دا جىبەرىلەدى. مۇندا كليەنتتىڭ SMS-كە كەلىسىمى عانا كەرەك. قاجەتتى مالىمەتتەر مەملەكەتتىك ورگانداردىڭ اقپاراتتىق جۇيەلەرىنەن الىنادى. حقكو-عا بارۋدىڭ قاجەتى جوق»، – دەيدى «ازاماتتارعا ارنالعان ۇكىمەت» مەملەكەتتىك كورپوراسياسىنىڭ باسقارما ءتوراعاسى ءادىل قوجىقوۆ.
كوپبالالى وتباسىلار ءۇشىن جاردەماقى 2020 جىلدىڭ باسىنان باستاپ تولەنەدى. تولەمدى ءتورت جانە ودان دا كوپ بالا تۋعان ايەلدەر الا الادى.
قازىرگى ۋاقىتتا بۇل جاردەماقىنى 487 مىڭنان استام قازاقستاندىق وتباسى الادى. ونىڭ ىشىندە 63 437 ايەل «التىن القا»، 138 571 ايەل «كۇمىس القا» يەگەرلەرى.
2022 جىلى كوپ بالالى وتباسىلارعا تاعايىندالاتىن جاردەماقى مولشەرى:
4 بالاعا 49 100 تەڭگە؛
5 بالاعا 61 383 تەڭگە؛
6 بالاعا 73 666 تەڭگە؛
7 بالاعا 85 948 تەڭگە؛
8 بالاعا 98230 تەڭگە؛
كەلەسى ءار بالاعا +4 اەك.
ايتا كەتەيىك، قازاقستاندا 4 جانە ودان دا كوپ كامەلەتكە تولماعان بالاسى نەمەسە 23 جاسقا تولعانعا دەيىن كۇندىزگى بولىمدە وقيتىن بىرگە تۇراتىن بالالارى بارلار كوپبالالى وتباسى بولىپ سانالادى.
6 بالا تۋعان جانە تاربيەلەگەن كوپبالالى انالارعا «كۇمىس القا»، ال 7 جانە ودان دا كوپ بالا تۋىپ، تاربيەلەگەندەرگە «التىن القا» بەرىلەدى.
1414 نومىرىنەن قىزمەتتەردى پرواكتيۆتى تۇردە راسىمدەۋدى ۇسىناتىن sms-حابارلامالاردى الۋ ءۇشىن تەلەفون ءنومىرى ءموبيلدى ازاماتتار بازاسىندا تىركەلۋى ءتيىس.
ەگەر ايەل قانداي دا ءبىر سەبەپتەرمەن SMS ارقىلى قىزمەت الا الماسا، ول بۇرىنعىداي حقكو-عا جۇگىنە الادى.