مەملەكەتتىك قولداۋ ارتا تۇسپەك.
بۇگىن ماجىلىستەگى ۇكىمەت ساعاتىندا ق ر ەڭبەك جانە حالىقتى الەۋمەتتىك قورعاۋ ءمينيسترى تامارا دۇيسەنوۆا ق ر الەۋمەتتىك كودەكسى جوباسىنا ەنگىزىلەتىن جاڭا پارامەترلەر وتباسىلارعا بەرىلەتىن مەملەكەتتىك قولداۋدى كەڭەيتەتىنىن ايتتى، دەپ حابارلايدى Almaty-akshamy.kz قازاقپاراتقا سىلتەمە جاساپ.
«كودەكس وتباسى مۇشەلەرىن الەۋمەتتىك قولداۋعا باعىتتالىپ وتىر. سيفرلىق كارتانى قاناتقاقتى جوبا رەتىندە ىسكە اسىرۋ بارىسىندا كوپ بالالى وتباسىلاردىڭ الەۋمەتتىك قاتەرلەرگە تاپ بولۋ ىقتيمالى جوعارى ەكەنىن كوردىك. وسى ورايدا الەۋمەتتىك كودەكسى جوباسىندا بالالى وتباسىلاردى الەۋمەتتىك قولداۋدىڭ قولدانىستاعى ءبىرتۇتاس جۇيەسىن تولىق ساقتاۋ جانە ونىڭ نەگىزگى پارامەترلەرىن وزگەرتۋ قاراستىرىلدى. ناقتىلاي كەتەيىن، بۇگىنگى بالالى وتباسىلاردى قولداۋ جۇيەسى حالىقارالىق ستاندارعا سايكەس جۇكتىلىك جانە بوسانۋ، بالا تۋۋ، بالا كۇتىمىنە بايلانىستى تولەمدەردى، كوپ بالالى انالار جانە مۇگەدىكتىگى بار بالالى وتباسىلارعا قاراستى تولەمدەردى جانە تابىسى از وتباسىلارعا بەرىلەتىن اتاۋلى الەۋمەتتىك كومەكتەردى قامتيدى»، - دەدى ت. دۇيسەنوۆا.
ونىڭ ايتۋىنشا، كودەكس جوباسىنا ەنگىزىلەتىن جاڭا پارامەترلەر وتباسىلارعا بەرىلەتىن مەملەكەتتىك قولداۋدى كەڭەيتەدى.
«مەملەكەت باسشىسىنىڭ تاپسىرماسى بويىنشا، 18 جاسقا دەيىنگى بالالارعا بەرىلەتىن ۇلتتىق قوردىڭ ينۆەستيسيالىق كىرىسىنەن تۇسكەن تابىستىڭ 50 پايىزى كولەمىندەگى باستاپقى كاپيتال قوسىمشا كومەك كوزى بولماق. بالا كۇتىمىنە بايلانىستى تولەمدەر مەرزىمى ۇزارتىلاتىن بولادى. كوپ بالالى انالارعا بەرىلەتىن جاردەماقى مولشەرى وسەدى جانە ولار «التىن القا» جانە «كۇمىس القامەن» ناگرادتتالعان انالار دەگەن جاڭا ستاتۋسپەن قاراستىرىلاتىن بولادى. تاعى ءبىر ماڭىزدى پارامەتر – 2025 جىلدان باستاپ اتاۋلى الەۋمەتتىك كومەك تاعايىنداۋ ءۇشىن كەدەيلىك شەگى بۇگىنگى كۇنكورىس دەڭگەيىنەن ەمەس، مەدياندىق تابىس ەسەبىنەن انىقتالاتىن بولادى. بۇل رەتتە ەكونوميكالىق ىنتىماقتاستىق جانە دامۋ ۇيىمى ەلدەرىنىڭ تاجىريبەسى زەردەلەندى. اتاپ ايتقاندا، 8-دەن استام ەل وسى كورسەتكىشتى پايدالانادى جانە ونى وتباسى ءال-اۋقاتىنىڭ ناقتى دارەجەسىن كورسەتەتىن ولشەم رەتىندە بەلگىلەگەن. بۇگىندە اقش-تاعى كەدەيلىك شەگى مەديانالىق كىرىستىڭ 40 پايىزىن قۇرايدى، ال كانادادا – 50 پايىز، شۆەسيا، نورۆەگيا، دانيا، اۆستريا، گەرمانيا جانە فرانسيادا 60 پايىز. ءبىز دە وسى تاجىريبەنى ەنگىزگەلى وتىرمىز»، - دەدى مينيستر.