1 000 تەڭگەلىك كۇمىس مونەتالاردىڭ قاشان ساتۋعا شىعارىلاتىنى قوسىمشا حابارلانادى
ۇلتتىق بانك «ەستە قالاتىن وقيعالار مەن ءبىرتۋار ادامدار» سەرياسىنان قازاقستان كونستيتۋسياسىنا 30 جىل كوللەكسيالىق مونەتالارىن اينالىسقا شىعارادى، دەپ حابارلايدى Azattyq Rýhy ۇلتتىق بانكتىڭ باسپا ءسوز قىزمەتىنە سىلتەمە جاساپ.
قازاقستان كونستيتۋسياسىنا 30 جىل مونەتالارى تۋرالى
قازاقستان كونستيتۋسياسىنىڭ 30 جىلدىعى – ەلىمىزدىڭ قۇقىقتىق مەملەكەت قۇرۋ جانە دەموكراتيالىق ينستيتۋتتاردى نىعايتۋ جولىنداعى تاريحي تاعدىرىن ايشىقتايتىن ايتۋلى داتا. اتا زاڭ تاۋەلسىزدىكتىڭ ىرگەتاسى، بىرلىك پەن ازاماتتىق كەلىسىمنىڭ سيمۆولى سانالادى.
مونەتالاردا ەل كونستيتۋسياسىن ايشىقتايتىن اشىق كىتاپ، ال ونىڭ ۇستىندە قازاقستان كارتاسىنىڭ كونتۋرى فونىندا «30» سانى بەينەلەنگەن. قازاقستان كارتاسىنىڭ ءدال ورتاسىنا كۇندى بەينەلەيتىن شاڭىراق ورنالاسقان. «30» سانىن بەينەلەۋ ىسىندە التىن جالاتۋ تەحنولوگياسى قولدانىلعان. مونەتانىڭ ەرەكشەلىگى دە سوندا.
مونەتالار:
التىن جالاتىلعان 925 سىنامدى كۇمىستەن جاسالعان. ماسساسى 31،1 گرامم، ديامەترى 38،61 مم، دايىنداۋ ساپاسى – «proof»، نومينالى 1 000 تەڭگەلىك، تارالىمى – 1 000 (ءبىر مىڭ) دانا؛
نيبراسس/نەيزيلبەر قوسپالارىنان (بيكولورلى) جاسالعان. ماسساسى 6،45 گرامم، ديامەترى 24،5 مم، دايىنداۋ ساپاسى – «uncirculated»، نومينالى 100 تەڭگەلىك، تارالىمى – 5 000 000 (بەس ميلليون) دانا.
نومينالى 1 000 تەڭگەلىك كۇمىس مونەتالاردىڭ قۇب ينتەرنەت-دۇكەنى ارقىلى قاشان ساتۋعا شىعارىلاتىنى قۇب رەسمي سايتىندا قوسىمشا حابارلانادى.
نومينالى 100 تەڭگەلىك بيكولورلى مونەتالار سيركۋلياسيالىق مونەتالارمەن بىرگە قازاقستان رەسپۋبليكاسىنىڭ اۋماعىندا ەركىن اينالىمدا بولادى.
كوللەكسيالىق مونەتالار قازاقستان رەسپۋبليكاسىنىڭ بۇكىل اۋماعىندا وزدەرىنىڭ بەلگىلەنگەن قۇنىنا ساي تولەمنىڭ بارلىق ءتۇرى بويىنشا قابىلدانۋعا، سونداي-اق ەلدىڭ بارلىق بانكىندەگى بانكتىك شوتتارعا ەسەپكە الىنۋعا جانە اۋدارىم جاسالۋعا، ۇساقتالۋعا جانە ايىرباستالۋعا جاتادى.
كوللەكسيالىق مونەتالار قازاقستان تەڭگە سارايىندا دايىندالدى.