قازاقستان رەسپۋبليكاسىنىڭ جاڭا كونستيتۋسياسىن قابىلداۋ قاجەتتىگى كونستيتۋسيالىق رەفورما جونىندەگى كوميسسيانىڭ بەسىنشى وتىرىسىندا تالقىلاندى. ءماجىلىس دەپۋتاتى سنەجاننا يماشيەۆا جاڭا تۇزەتۋلەر كونستيتۋسيانىڭ 77 بابىنا ەنگىزىلىپ، نەگىزگى زاڭ ءماتىنىنىڭ 84 پايىزىن جاڭارتاتىنىن، ءىس جۇزىندە بارلىق ءبولىم قامتىلاتىنىن ايتتى.
يماشيەۆا بايانداماسىندا جوبانىڭ پرەامبۋلاسىن تولىق جاڭا رەداكسيادا قابىلداۋ، جاڭارتىلعان جالپىۇلتتىق قۇندىلىقتار، مەملەكەتتىڭ ميسسياسى، تاريحي كونتەكست پەن ەلدىڭ ودان ءارى دامۋ باعىتتارىن كورسەتۋ كوزدەلەتىنىن اتاپ ءوتتى. سونىمەن قاتار «حالىق كەڭەسى» جانە «كونستيتۋسياعا وزگەرىستەر مەن تولىقتىرۋلار ەنگىزۋ» اتتى ەكى جاڭا ءبولىم ەنگىزىلىپ، ءتورت ءبولىمنىڭ اتاۋى مەن مازمۇنىنا وزگەرىستەر ەنگىزىلمەك.
«كونستيتۋسيالىق قۇرىلىمنىڭ نەگىزدەرى ەلەۋلى تۇردە قايتا قارالىپ، پرەزيدەنتتىك باسقارۋ نىسانى ساقتالا وتىرىپ، ءبىرىڭعاي مەملەكەتتىك بيلىك جۇيەسىنىڭ ۇيىمداستىرىلۋى وزگەرەدى. ازاماتتاردىڭ مەملەكەت ءىسىن باسقارۋعا قاتىسۋ نىساندارى كەڭەيتىلىپ، ادام مەن ازاماتتىڭ قۇقىقتارى مەن بوستاندىقتارىن قورعاۋ كەپىلدىكتەرى كۇشەيتىلەدى، كونستيتۋسيالىق سوتتىڭ كونستيتۋسيانىڭ ۇستەمدىگىن قامتاماسىز ەتۋدەگى ءرولى ارتا تۇسەدى. وسىلايشا، ءسوز جەكەلەگەن تۇزەتۋلەر تۋرالى ەمەس، نەگىزگى زاڭنىڭ مازمۇنى مەن تۇجىرىمدامالىق تاسىلدەرىن تۇبەگەيلى وزگەرتەتىن تەرەڭ كونستيتۋسيالىق جاڭعىرتۋ تۋرالى بولىپ وتىر»،- دەدى دەپۋتات.
دەپۋتات سونىمەن قاتار «قۇقىقتىق اكتىلەر تۋرالى» زاڭنىڭ 26-بابىنىڭ 9-تارماعىن ەسكە سالىپ، نورماتيۆتىك اكتىنىڭ جارتىسىنان استامى وزگەرسە، ونىڭ جاڭا رەداكسياسى قابىلداناتىنىن اتاپ ءوتتى. وسىعان سۇيەنە وتىرىپ، جاڭا كونستيتۋسيا قازىرگى زامان تالاپتارىنا، قوعام سۇرانىسىنا جانە مەملەكەتتىڭ ستراتەگيالىق دامۋ ماقساتتارىنا ساي كەلەتىنى، تەك قۇقىقتىق نەگىزدى عانا ەمەس، سونىمەن بىرگە ازاماتتىق قۇندىلىقتار مەن مەملەكەتتىڭ ستراتەگيالىق باعىتىن كورسەتەتىن قۇجات ەكەنى كورسەتىلدى.