تاياۋدا ساياباققا اپاراتىن جولدىڭ قۇرىلىسى باستالىپ، ەلەكتر جەلىلەرى تارتىلادى
كولساي كولدەرى ۇلتتىق پاركىنە باراتىن جول سالىنىپ، بوگەت تۇرعىزىلادى. بۇل تۋرالى كەگەن اۋدانىنا جۇمىس ساپارىمەن بارعان الماتى وبلىسىنىڭ اكىمى مارات سۇلتانعازييەۆ مالىمدەدى، دەپ حابارلايدى Almaty-akshamy.kz قازاقپاراتقا سىلتەمە جاساپ.
ساپار اياسىندا قايىڭدى كولىن ساقتاپ قالۋ ماسەلەسى قارالدى. ءوڭىر باسشىسىنىڭ سوزىنشە، سوڭعى جىلدارى اتالعان سۋ قويماسىنداعى سۋ دەڭگەيى تومەندەپ كەتكەن. سوندىقتان ماسەلىنىڭ شەشىمى رەتىندە مۇندا بوگەت سالۋ جوسپارلانىپ وتىر. بۇل ماسەلە ەكولوگيا مينيسترلىگىمەن بىرلەسىپ پىسىقتالادى.
بۇعان قوسا، تاياۋدا ساياباققا اپاراتىن جولدىڭ قۇرىلىسى باستالىپ، ەلەكتر جەلىلەرى تارتىلادى. ۇلتتىق پارك ديرەكتورىنىڭ ايتۋىنشا، قازىرگى تاڭدا اتتى جانە جاياۋ جۇرگىنشىلەرگە ارنالعان جولدىڭ جوباسى ازىرلەنىپ جاتىر. بۇدان وزگە، كولساي اۋماعىندا بيواجەتحانالار ورناتىپ، تۋريستتىك پوليسيا بولىمشەلەرى مەن فەلدشەرلىك-اكۋشەرلىك پۋنكت سالۋ ماسەلەسى قارالىپ جاتىر.
ايتا كەتەيىك، بۇعان دەيىن ىلە الاتاۋى ۇلتتىق پاركىنىڭ سەل ءجۇرۋ ءقاۋپى جوعارى ايماقتارىنا بوگەت سالىناتىنىن حابارلاپ ەدىك.