مۇنداي شەشىم يۋنەسكو باعدارلاماسىنىڭ «ادام جانە بيوسفەرا» حالىقارالىق ۇيلەستىرۋ كەڭەسىنىڭ 33-سەسسياسىندا قابىلداندى.
يۋنەسكو قازاقستاندىق «كولساي كولدەرى» مەملەكەتتىك ۇلتتىق تابيعي پاركىن ءوزىنىڭ دۇنيەجۇزىلىك بيوسفەرالىق رەزەرۆاتتار جەلىسىنە قوستى، دەپ حابارلايدى Almaty-akshamy.kz ق ر ەكولوگيا، گەولوگيا جانە تابيعي رەسۋرستار مينيسترلىگىنىڭ باسپا ءسوز قىزمەتىنە سىلتەمە جاساپ.
«كولساي كولدەرى» مەملەكەتتىك ۇلتتىق تابيعي پاركى اكىمشىلىگى قىزمەتكەرلەرىنىڭ ۇيلەسىمدى جۇمىسىنىڭ ارقاسىندا قازاقستانداعى يۋنەسكو-نىڭ «ادام جانە بيوسفەرا» باعدارلاماسىنىڭ بيوسفەرالىق رەزەرۆاتتارىنىڭ ۇلتتىق جەلىسى تاعى ءبىر بيوسفەرالىق رەزەرۆاتپەن تولىقتىرىلدى.
وسىلايشا، بۇگىنگى تاڭدا يۋنەسكو ۇلتتىق جەلىسىنىڭ قازاقستانداعى بيوسفەرالىق رەزەرۆات سانى – 13. بۇل سان ورتالىق ازيانىڭ باسقا ەلدەرىندەگى بيوسفەرالىق رەزەرۆاتتار سانىنان ەداۋىر اسىپ تۇسەدى.