تاۋەلسىزدىك مەرەكەسىنە وراي الماتى قالاسى قاج دەپارتامەنتىنە قاراستى №11 مەكەمەسىنىڭ جەكە قۇرامى قوعام بەلسەندىسى، جەلتوقسان قاتىسۋشىسى، «جەلتوقسان اقيقاتى» رەسپۋبليكالىق قوعامدىق بىرلەستىگىنىڭ مۇشەسى اريپ قابىلانوۆپەن جۇزدەستى.
اريپ سمايىل ۇلى سوناۋ 1986 جىلعى جەلتوقساندا كوزىمەن كورگەن وقيعالارىمەن ءبولىسىپ، سول كەزەڭنىڭ اششى شىندىعىن اڭگىمەلەپ، قازاق جاستارىنىڭ ازاماتتىعىن ايتىپ تولعاندى. جەلتوقسان وقيعاسىنىڭ اقىرىندا بابالارىمىز ارمانداعان تاۋەلسىزدىككە قول جەتكىزگەنىمىزدى، دەگەنمەن، وسى جولدا تالاي بوزداقتىڭ شەيىت بولعاندىعىن اتاپ ءوتتى. جاستاردى وسىناۋ ەگەمەندىكتىڭ ءقادىرىن بىلۋگە، وتانشىل، پاتريوت بولۋعا شاقىردى.
№11 مەكەمەسىندە جازاسىن وتەپ جاتقان جاسوسپىرىمدەر تاۋەلسىزدىك كۇنىنە ارنالعان ولەڭدەرىن مانەرلەپ وقىدى. سونداي-اق، ولاردىڭ نازارىنا ينتەراكتيۆتى تاقتادان جەلتوقسان تۋرالى سلايدتتار ۇسىنىلدى.
– ەلىمىزدىڭ ەگەمەندىگىن دارىپتەيتىن، بويعا قايرات، جۇرەككە رۋح بەرەتىن جان تەبىرەتەرلىك جىر جولدارى، جەلتوقساننىڭ ىزعارىن بەينەلەيتىن فيلمدەر جۇرەكتەرگە جول تاپتى دەپ ويلايمىن. تاريحي ماڭىزى زور بۇل ءىس-شارا بىزدە جازاسىن وتەپ جاتقان جاستار ءۇشىن تاربيە. ءبىز وزىمىزگە ءومىرى ۇلگى ازاماتتاردى ءجيى شاقىراتىنىمىز دا سوندىقتان. ءار بالانى ءتۇزۋ جولعا باعىتتاي بىلسەك – ەڭ ۇلكەن جەتىستىك سول بولماق، – دەگەن مەكەمە باستىعى، ادىلەت پولكوۆنيگى المات سۇلەيمەنوۆ جەلتوقسان قاتىسۋشىسى اريپ قابىلانوۆقا مەكەمە ۇجىمى اتىنان العىس ءبىلدىردى.