ۇكىمەت وتىرىسىندا وقۋ-اعارتۋ ءمينيسترى عاني بەيسەمبايەۆ مەملەكەت باسشىسى جاريالاعان جۇمىسشى ماماندىقتارى جىلى شەڭبەرىندە تجكب جۇيەسىن دامىتۋ بويىنشا اعىمداعى ناتيجەلەر تۋرالى باياندادى، دەپ حابارلايدى aqshamnews.kz
مينيسترلىكتىڭ مالىمەتىنشە، 2024-2025 وقۋ جىلىندا كوللەدجدەردە 550 مىڭنان استام ستۋدەنت ءبىلىم العان. 173 مىڭ ستۋدەنت وقۋىن بىتىرەدى، ونىڭ ىشىندە جۇمىس بىلىكتىلىگى بويىنشا 123 مىڭ ستۋدەنت، دۋالدى وقىتۋ شەڭبەرىندە 27 مىڭ ستۋدەنت ءبىلىم الىپ شىعادى. كاسىپورىنداردىڭ ماقساتتى تاپسىرىسى بويىنشا 10 مىڭ ستۋدەنت ءبىتىردى.
«جىل سايىن كوللەدج تۇلەكتەرىن جۇمىسقا ورنالاستىرۋ كورسەتكىشى وسۋدە: 2024 جىلى تۇلەكتەردىڭ 81%-ى جۇمىسپەن قامتىلدى. جۇمىسشى ماماندىقتارى جىلى اياسىندا جۇمىسشى ماماندىقتاردىڭ بەدەلىن ارتتىرۋعا جانە كوللەدجدەردىڭ بيزنەسپەن ءوزارا ءىس-قيمىلىنا اسا نازار اۋدارىلۋدا. وقۋ جىلىنىڭ قورىتىندىسى بويىنشا قامقورلىق كومەك كورسەتەتىن كاسىپورىنداردىڭ سانى 7 ەسە ارتتى. بۇگىنگى تاڭدا 4 مىڭنان استام كاسىپورىن 662 كوللەدجگە، وتكەن جىلدىڭ قورىتىندىسى بويىنشا 412 كوللەدجگە 558 كاسىپورىن قامقورلىق كورسەتۋدە»، دەپ اتاپ ءوتتى عاني بەيسەمبايەۆ.
ونىڭ ايتۋىنشا، «پەداگوگ-كاسىبي باعدارلاۋشى» لاۋازىمى العاش رەت رەسمي تۇردە بەكىتىلدى. 905 جوعارى سىنىپ وقۋشىسى جالپى ءبىلىم تۋرالى اتتەستاتپەن قاتار، جۇمىسشى بىلىكتىلىگى بويىنشا ديپلوم الدى. 2،5 ملن مەكتەپ وقۋشىسى كاسىبي باعدارلاۋشى شارالارىمەن قامتىلدى.
104 كوللەدجدىڭ ماتەريالدىق-تەحنيكالىق بازاسى جاڭارتىلدى. ستۋدەنتتەردىڭ تۇرمىس جاعدايىن جاقسارتۋ ءۇشىن 2 مىڭ ورىنعا ارنالعان 8 جاتاقحانا پايدالانۋعا بەرىلدى. بيزنەس وكىلدەرى 8 مىڭنان استام ءبىلىم بەرۋ باعدارلامالارىن ازىرلەۋگە قاتىستى.