كولىكتەردىڭ مەملەكەتتىك ءنومىرىن ۇرلاۋشى الماتىلىق ۇستالدى

ۇرى ولار ءۇشىن وتەماقى تالاپ ەتىپ كەلگەن.

الماتىدا جاس جىگىت كولىكتەردەن مەملەكەتتىك تىركەۋ نومىرلىك بەلگىلەرىن شەشىپ الىپ، كەيىن ونى يەسىنە اقى تولەگەن جاعدايدا عانا قايتارىپ جۇرگەن، دەپ حابارلايدى Almaty-akshamy.kz Polisia.kz-كە سىلتەمە جاساپ. 

«كۇدىكتى كۇردەلى ەمەس “تابىس تابۋ” تىزبەگىن ويلاپ تاپقان. تۇندە ول تۇراقتا تۇرعان كولىكتەردىڭ مەملەكەتتىك نومىرلەرىن شەشىپ الىپ، كولىكتىڭ ايناسىنا ۇرلانعان ءنومىردى قايتارىپ الۋ ءۇشىن وتەماقى تولەۋ شارتى جازىلعان جازۋدى قالدىرىپ كەتكەن. سودان كەيىن ىسكەر جىگىت نومىرلىك بەلگى جاسىرىلعان مەكەنجايدى حابارلاعان. جەدەل-ىزدەستىرۋ ءىس-شارالارى بارىسىندا كۇدىكتى ۇستالدى. 21 جاستاعى ا. ەسىمدى ازامات، وسىعان ۇقساس تاعى 5 ۇرلىق جاساعانىن مويىندادى. اتالعان ەپيزودتار بويىنشا ق ر قك-نىڭ 188-بابىنا (ۇرلىق) سايكەس سوتقا دەيىنگى تەرگەۋ امالدارى جۇرگىزىلىپ جاتىر»، – دەيدى جەتىسۋ اۋداندىق پوليسيا باسقارماسىنىڭ باستىعى جانىبەك شىناسىلوۆ.

ق ر قپك-نىڭ 201-بابىنا سايكەس وزگە اقپاراتتار تەرگەۋ مۇددەسىنە وراي جاريالاۋعا جاتپايدى. ق ر كونستيتۋسياسىنىڭ 77-بابىنىڭ 3-تارماعىنىڭ 1-تارماقشاسىنا جانە ق ر قپك-نىڭ 19-بابى 1-بولىگىنە سايكەس، زاڭدى كۇشىنە ەنگەن سوت ۇكىمىمەن بەلگىلەنگەنگە دەيىن ءاربىر ادام قىلمىستىق قۇقىق بۇزۋشىلىق جاساۋدا كىناسىز دەپ تانىلادى.