ق ر كولىك ءمينيسترى دەمالىس كۇندەرىن پايدالانىپ، الماتى، جامبىل جانە قاراعاندى وبلىستارىنىڭ كولىك ينفراقۇرىلىمى وبەكتىلەرىمەن تانىسپاق، دەپ حابارلايدى almaty-akshamy.kz.
مارات قارابايەۆتىڭ وڭىرلەرگە كەزەكتى جۇمىس ساپارى الماتى قالاسىنداعى لوگيستيكا جانە كولىك اكادەمياسىنا بارۋدان باستالدى. اكادەميا تاريحى 1931 جىلدان ورتا ازيا تەمىرجول ينجەنەرلەرى ينستيتۋتىنىڭ فيليالى اشىلعاننان باستالادى. بۇگىندە ول قازاقستاننىڭ تەحنيكالىق جوعارى وقۋ ورىندارىنىڭ اراسىندا ۇزدىك بەستىككە كىرەدى.
اكادەميانىڭ ماتەريالدىق-تەحنيكالىق بازاسىمەن تانىسۋ بارىسىندا مينيستر جوو وقىتۋشىلارىمەن كەزدەسۋ وتكىزىپ، كولىك مينيسترلىگى مەن اكادەميا اراسىندا ورناتىلعان ىنتىماقتاستىقتى ودان ءارى ىلگەرىلەتۋ جولدارىن بەلگىلەدى.
ءارى قاراي مارات قارابايەۆ الماتى مەتروپوليتەنىنە باردى. قازىرگى ۋاقىتتا الماتىدا 11 مەترو ستانسياسى جۇمىس ىستەيدى، ۇزىندىعى 13 كم جەلىدە ەلەكتر پويىزدارىنىڭ 15 قۇرامى جۇرەدى، ورتاشا جولاۋشىلار اعىنى كۇنىنە 80-85 مىڭ ادامدى قۇرايدى.
ۆەدومستۆو باسشىسى «جىبەك جولى» ستانسياسىنداعى ورتالىق ديسپەچەرلىك باسقارمانىڭ دا جۇمىسىمەن تانىستى. كاسىپورىن باسشىلىعىمەن كەزدەسۋدە كولىك ءمينيسترى الماتىدا مەترونىڭ دامۋىنىڭ ماڭىزدىلىعىن اتاپ ءوتىپ، جۇرگىزىلىپ جاتقان جۇمىستاردىڭ ساپاسىنا ءتيىستى باقىلاۋدى قامتاماسىز ەتۋدى تاپسىردى.
سودان كەيىن مارات قارابايەۆ جۇمىس ىستەپ تۇرعان ستانسيالاردىڭ جاي-كۇيى مەن قىزمەت كورسەتۋ ساپاسىن تەكسەرىپ، سونداي-اق الداعى ۋاقىتتا قولدانىسقا بەرىلەتىن «قالقامان» ستانسياسىنىڭ قۇرىلىس الاڭىنا باردى. نىساندى 2025 جىلعا قاراي پايدالانۋعا بەرۋ جوسپارلانعان.
مينيستر جۇمىس ساپارى اياسىندا «ۇزىناعاش-وتار» اۆتوجولىن قايتا جاڭارتۋ ۋچاسكەسىنە بارىپ، ءۇاااج اۆتوجولىنىڭ جۇمىسىن تەكسەرەدى. مينيسترلىك باسشىسى جەكسەنبى كۇنى قونايەۆ قالاسىنداعى تەمىرجول ۆوكزالىنىڭ جۇمىسىمەن تانىسىپ، «قۇرتى-قونايەۆ» اۆتوجولىندا قايتا جاڭارتۋ بويىنشا جۇمىستار جۇزەگە اسىرىلىپ جاتقان ۋچاسكەلەردى تەكسەرەدى.
بۇدان ءارى مينيستر قۇرتى اۋىلىنان قاراعاندى قالاسىنا دەيىنگى ۋچاسكەدە «الماتى-ەكاتەرينبۋرگ» اۆتوجولىمەن اۆتوكولىكپەن ءجۇرىپ وتەدى. ساپار بارىسىندا مارات قارابايەۆ «قۇرتى-بۋرىلبايتال»، «بالقاش-بۋرىلبايتال» جانە «قاراعاندى-بالقاش» قايتا قۇرۋ ۋچاسكەلەرىن تەكسەرەدى.