كولىك جوندەۋ ورتالىعىندا جارىلىس بولدى

قىزىل جالىن شامامەن 100 شارشى مەتر اۋماققا جايىلدى

پەتروپاۆلدا كولىك جوندەۋ ستانساسىندا جارىلىس بولىپ، 9 ادام جاراقاتتاندى، دەپ حابارلايدى Almaty-akshamy.kz.

اپات سالدارىنان 9 ادام جاراقات العان. وقيعا ورنىندا 50-گە جۋىق ادام ءتىلسىز جاۋمەن كۇرەستى.

16 قاراشا كۇنى ساعات 16.16-دا «101» تەلەفونىنا گاشەكا كوشەسى 8 مەكەنجايى بويىنشا ورنالاسقان عيماراتتىڭ ورتكە ورانىپ جاتقانى جايىندا حابارلاما كەلىپ تۇسكەن. اينالاسى جەتى مينۋتتىڭ ىشىندە توتەنشە جاعداي ورنىنا قۇتقارۋشىلار جەتىپ، ءتىلسىز جاۋدى اۋىزدىقتاۋعا كىرىستى.

الدىن الا بولجام بويىنشا، جوندەۋدە تۇرعان اۆتوموبيلدەردىڭ بىرىنە ورناتىلعان گاز باللونى جارىلىپ كەتكەن. مۇنىمەن قوسا تاعى بىرنەشە   كولىككە زاقىم كەلدى.

«اپات اۆتوموبيلدە ورناتىلعان گاز باللونداعى اقاۋمەن قۇرىلىس كونسترۋكسيالارىنىڭ ورتەنىپ، قۇلاۋ سالدارىنان بولدى. قىزىل جالىن شامامەن 100 شارشى مەتر اۋماققا جايىلدى. وقيعا ورنىندا ءتۇرلى دارەجەدەگى جاراقات العان توعىز ادامعا مەديسينالىق كومەك كورسەتىلدى. ولاردىڭ جەكە تۇلعاسى انىقتالىپ، كەيبىرى اۋرۋحاناعا جاتقىزىلدى. ال زارداپ شەككەندەرمەن جانە ولاردىڭ تۋىستارىمەن سقو تجد پسيحولوگيالىق كومەك توبىنىڭ ماماندارى جۇمىس ىستەدى.

سقو تجد ءورت ءسوندىرۋ قىزمەتىنىڭ كۇشىمەن (جەكە قۇرامنىڭ 43 ادامى جانە 10 بىرلىك تەحنيكا) ءورت ساعات 16.53-تە وقشاۋلاندى. قازا تاپقاندار جوق. ماتەريالدىق زالال مەن شىعىن كولەمى ەسەپتەلەتىن بولادى»، – دەلىنگەن وبلىستىق تجد ماماندارى تاراتقان اقپاراتتا.