جەكە تۇلعالاردىڭ اراسىنداعى اقشا اۋدارىمدارىنا سالىق سالىنا ما؟
جەكە تۇلعالاردىڭ ءموبيلدى اقشا اۋدارىمدارى باقىلاناتىنى تۋرالى اقپارات تاراعالى قوعامدا ءبىراز پىكىرتالاس تۋدى. قارجى مينيسترلىگىنىڭ 29 ناۋرىزداعى بۇيرىعىمەن جەكە تۇلعالاردىڭ بانكتىك شوتتارىندا جۇرگىزىلەتىن وپەراسيالاردى كاسىپكەرلىك قىزمەتتى جۇزەگە اسىرۋدان كىرىس الۋ بەلگىلەرى بار وپەراسيالارعا جاتقىزۋ كريتەرييلەرى بەكىتىلىپ، 15 ءساۋىر كۇنى كۇشىنە ەندى.
اقشا اۋدارىمدارىن باقىلاۋ ارقىلى جەكە تۇلعانىڭ كاسىپكەرلىككە قاتىسى بار-جوعى انىقتالادى. ناقتىلاساق، جەكە تۇلعانىڭ بانك شوتىنا باسقا تۇلعادان قاتارىنان 3 اي ىشىندە 100 مىڭ نەمەسە ودان دا كوپ قاراجات تۇسسە، وندا بۇل كاسىپكەرلىكتەن پايدا تابۋ دەپ ەسەپتەلەدى.
ەل اراسىندا قىزۋ تالقىلانعان بۇل ماسەلە توڭىرەگىندە ماماننىڭ پىكىرىن بىلە كەتكەندى ءجون كوردىك.
پەريزات باۋىرجان قىزى، قارجى ساراپشىسى:
- 2021 جىلدىڭ 25 قاراشاسىندا پارلامەنت «سالىق جانە بيۋدجەتتەگى وزگە دە مىندەتتى تولەمدەر تۋرالى» زاڭ جوباسىن قابىلداعان سوڭ، حالىق اراسىندا تەلەفون ارقىلى جاسالاتىن ءموبيلدى اۋدارىمدار تاقىرىبى قىزۋ تالقىعا ءتۇستى. سالىق تولەۋدى ەستىگەن جۇرت ءموبيلدى تولەمدەردەن جاپپاي باس تارتىپ جاتقانىن كورىپ ءجۇرمىز. ال «15 ساۋىردەن باستاپ ق ر قارجى مينيسترلىگىنىڭ مەملەكەتتىك كىرىستەر كوميتەتى جەكە تۇلعالاردىڭ بانك شوتتارىنىڭ اراسىنداعى ءموبيلدى اقشا اۋدارىمدارىنا مونيتورينگ جۇرگىزۋدى باستايدى» دەگەندى ەستىگەن ساۋداگەرلەر ساۋدالارىن قولما-قول اقشامەن جۇرگىزە باستادى.
سونىمەن قاتار، ەلدە 1 ميلليون 200 مىڭ كاسىپكەر تىركەلگەن بولسا، سونىڭ 300 مىڭى ونلاين باقىلاۋ قۇرىلعىسىن مۇلدەم قولدانبايدى ەكەن. دەمەك، سالىقتان جالتارىپ ءجۇر. وسىنىڭ جولىن كەسۋ ءۇشىن دە زاڭ قايتا تالقىلانۋدا.
ءار تابىس تاۋىپ وتىرعان تۇلعا مەملەكەتكە شىنايى سالىق تولەپ تۇرۋ قاجەت. كاسىپكەرلەر تابىستارىن جاسىرىپ قالماي، شىنايى جۇمىس ىستەۋدى داعدىعا اينالدىرعان دۇرىس. سەبەبى سالىقتان تۇسكەن قارجىعا مەكتەپ، اۋرۋحانا سالۋعا، ادامداردىڭ قۇقىعىن قورعاۋعا ءتيىس پوليسەيلەر مەن مەملەكەتتىك قىزمەتكەرلەر جالاقىسىنا، ازاماتتاردىڭ كەيبىر ساناتىنا: كوپ بالالى وتباسىلارعا، تابىسىنان ايىرىلعاندارعا، مۇگەدەكتىگى بارلارعا جاردەماقى تولەۋگە، جولدى جوندەۋگە جۇمسالادى.
ق ر قارجى مينيسترلىگى مەملەكەتتىك كىرىستەر كوميتەتى باسقارما باسشىسىنىڭ ورىنباسارىنىڭ ايتۋىنشا، جالپى اۋدارىمدار بولعان. مۇنىڭ ىشىندە كاسىپكەر دە، جەكە تۇلعالار دا بار. 35 تريلليون تەڭگە اۋدارعان. بۇل - ارنايى ۇلتتىق بانكتىڭ بەرگەن مالىمەتى. بيىل كاسىپكەرلىك ماقساتتا دا، جەكە ماسەلەنى دە قوسا العاندا 43 تريلليون اقشا اۋدارىلعان. ەندى ونلاين اقشا بەرۋدىڭ جولدارى انىقتالادى.
موبيلدىك تولەمدەردى باقىلاۋ ارقىلى تاۋارلار مەن كورسەتىلەتىن قىزمەتتەرگە اقى تولەۋ ءۇشىن ەسەپ ايىرىسۋلار كەزىندە ونلاين-باقىلاۋ-كاسسا ماشينالارىن قولدانۋدى زاڭداستىرۋ، كاسىپكەرلەردى بيزنەستى جۇرگىزۋگە ارنالعان جەكە شوتتاردى پايدالانۋعا مىندەتتەۋ، سالىقتى دۇرىس تولەۋ جولعا قويىلاتىن بولادى.
ال جەكە تۇلعالارعا كەلەر بولساق، جەكە تۇلعالاردىڭ اراسىنداعى اقشا اۋدارىمدارىنا سالىق سالىنبايدى. زاڭ جوباسىندا اقشا اۋدارىمىنا جاڭا سالىقتىڭ نەمەسە شەكتەۋدىڭ بولاتىنى كوزدەلمەگەن.