ماماندار سۋداعى قاۋىپسىزدىك ەرەجەلەرىن ساقتاۋ قاجەتتىلىگى تۋرالى ەسكەرتەدى.
الماتى قالاسىنىڭ تجد، 109 قۇتقارۋ قىزمەتىنىڭ قۇتقارۋشىلارى، پوليسەيلەر مەن ەرىكتىلەر قالانىڭ سۋ ايدىندارىندا قاۋىپسىزدىكتى قامتاماسىز ەتۋدى جالعاستىرۋدا، دەپ حابارلايدى Almaty-akshamy.kz.
18 شىلدەدە كەشكى 17-دە سايران كولىنىڭ جانىندا تۋىستارىمەن دەمالىپ وتىرعان 16 جاسار ر-نىڭ اياق كيىمىن تولقىن 15 مەتر قاشىقتىققا الىپ كەتتى. ءجاسوسپىرىم اياق كيىمىن قايتارۋ ءۇشىن بىردەن سۋعا سۇڭگىدى.
كەنەتتەن اياعىنىڭ استىنداعى جەردى سەزىنبەگەن بالا بويىن ۇرەي باسىپ، سۋدا تۇنشىعا باستادى. بۇل ۋاقىتتا 109 قىزمەتىنىڭ قۇتقارۋشىلارى جاعالاۋدان جاس جىگىتتىڭ باتىپ بارا جاتقانىن كورىپ، قۇتقارۋ شەڭبەرىن لاقتىرىپ، ۋاقىتىندا كومەك كورسەتتى. ولار سۋعا باتىپ بارا جاتقان جاس جىگىتتى جاعالاۋعا، ءقاۋىپسىز جەرگە جەتكىزىپ، اتا-اناسىنا امان-ەسەن تابىستادى. مەديسينالىق كومەك قاجەت بولمادى.
قالانىڭ سۋ قويمالارىندا دەمالۋشىلار قاراپايىم قاۋىپسىزدىك تالاپتارىن ساقتاماي، ونىڭ سوڭى كوبىنەسە قايعىلى جاعدايلارعا اكەلىپ جاتاتىنىن اتاپ ايتقان ءجون.
قالانىڭ سۋ ايدىندارىندا جازاتايىم وقيعالاردى بولدىرماۋ ماقساتىندا تجد، پد قىزمەتكەرلەرى، 109 قىزمەتىنىڭ ەرىكتىلەرى مەن قۇتقارۋشىلارى پاترۋلدەۋ جۇمىستارىن جۇرگىزەدى.
«دەمالىس كۇندەرى سايران كولىندە ق ر اقبك 440-بابىنا سايكەس پاترۋلدەۋ كەزىندە قوعامدىق ورىنداردا الكوگولدىك ىشىمدىكتەر ىشكەنى ءۇشىن 26، 30، 36 جاستاعى ءۇش ەر ادامعا ايىپپۇل سالىندى. ولاردىڭ بارلىعى سۋ ايدىنىندا الكوگولدىك ماس كۇيىندە بولعان، ال 5 ادام تىيىم سالىنعان جەرلەردە شومىلعانى ءۇشىن ءاب تۋرالى قرك 364-بابى بويىنشا اكىمشىلىك جاۋاپكەرشىلىككە تارتىلعان»،– دەلىنگەن الماتى قالاسىنىڭ توتەنشە جاعدايلار دەپارتامەنتىنىڭ حابارلاماسىندا.
حالىقپەن الدىن الۋ جۇمىسىندا تجد بەلسەندى كومەكشىلەرى «ليدەر كز»، «قازاقستان ەرىكتىلەر ليگاسى» ەرىكتىلەرى بىرگە جۇمىس جاساۋدا. ەكى كۇن ىشىندە 300-دەن استام سۋعا شومىلۋعا كەلۋشىلەرمەن ءتۇسىندىرۋ اڭگىمەسى وتكىزىلىپ، شومىلۋ كەزىندەگى قاۋىپسىزدىك جادىنامالارى تاراتىلدى.
تجد الماتى قالاسىنىڭ بارلىق تۇرعىندارى مەن قوناقتارىنا سۋداعى قاۋىپسىزدىك ەرەجەلەرىن ساقتاۋ قاجەتتىلىگى تۋرالى ەسكەرتەدى.
