اۋىل شارۋاشىلىعى ءمينيسترى ايداربەك ساپاروۆ اقمولا وبلىسىنىڭ ەگىستىك القاپتارى مەن ا.بارايەۆ اتىنداعى عىلىمي-وندىرىستىك ورتالىققا بارىپ، ءوڭىر شارۋالارىمەن كەزدەستى.
24 مامىردا اقمولا وبلىسىندا جالپى ەگىس القابىنىڭ 5،2 ملن گا-نا 1،6 ملن گا ەگىلدى. وبلىستىڭ ەگىس القاپتارىنىڭ 80% -ى قازاقستاندىق سەلەكسيانىڭ تۇقىمدارىمەن، ونىڭ ىشىندە ا.بارايەۆ اتىنداعى عىلىمي-وندىرىستىك ورتالىقتىڭ عالىمدارى شىعارعان سورتتارمەن سەبىلەدى.
ايداربەك ساپاروۆ ورتالىقتىڭ تالداۋ زەرتحانالارىندا بولىپ، شورتاندى جاقسارتىلعان 95، شورتاندى 2012، شورتاندى 2014، تايماس سياقتى سۇرىپتاردى كوبەيتۋ جونىندەگى عالىمداردىڭ جۇمىستارىمەن تانىستى. ورتالىق ۇجىمى ەگىستىكتى ءارتاراپتاندىرۋدىڭ تيىمدىلىگى، توپىراق ىلعالىن ساقتاۋ جانە ءتيىمدى پايدالانۋ، توپىراقتى ەروزيادان قورعاۋ، تۇقىمدىق ماتەريالدى ەگىسكە دايىنداۋ تۋرالى ايتتى.
«اييام-7» ج ش س القابىندا، ودان كەيىن ونلاين رەجيمدە مينيستر شارۋالاردىڭ ساۋالدارىنا جاۋاپ بەردى. سونداي-اق، اۋىل شارۋاشىلىعىن مەملەكەتتىك قولداۋ تەتىكتەرىندەگى وزگەرىستەر، ستاتيستيكامەن جۇمىس جانە اوك جالپى ءونىمىنىڭ كولەمىن 2 ەسەگە ارتتىرۋ مۇمكىندىكتەرى تۋرالى ءتۇسىندىردى.
«تىڭايتقىش بەرىپ، ساپالى تۇقىم پايدالاناتىن شارۋالار 20-25 س/گا ءونىم الىپ جاتىر»، - دەدى مينيستر.
بۇل تونناسى 70-80 مىڭ تەڭگەدەن ساتىلاتىن رەسەيلىك استىقپەن باسەكەلەسۋگە مۇمكىندىك بەرەدى دەيدى ول.
وكىنىشكە وراي، قازاقستاندا 6 مىڭنان استام شارۋاشىلىق تىڭايتقىشتاردىڭ جەتكىلىكتى كولەمىن پايدالانبايدى، ونىڭ باستى سەبەبى – مينەرالدى تىڭايتقىشتاردى ساتىپ الۋدى ۋاقتىلى قارجىلاندىرۋدىڭ جوقتىعى.
2024 جىلى قازاقستان رەسپۋبليكاسىنىڭ اۋىل شارۋاشىلىعى مينيسترلىگى مەملەكەت باسشىسىنىڭ تىڭايتقىش ەنگىزۋ كولەمىن 1،5 ميلليون تونناعا دەيىن ارتتىرۋ تۋرالى تاپسىرماسىن ورىنداۋ ماقساتىندا شارۋالارعا قاجەتتى قولداۋ شارالارىن كورسەتۋدە. الدىن الا سۋبسيديالاۋدىڭ جاڭا مەحانيزمى بار، تىڭايتقىش وندىرۋشىلەرمەن ءبولىپ تولەۋ ماسەلەسى پىسىقتالدى. بۇل شارۋاعا ءقازىر ەمەس، كەيىنىرەك ەگىننەن تولەۋگە مۇمكىندىك بەرەدى. ايداربەك ساپاروۆ شارۋالاردى قۇرالدى بەلسەندى پايدالانۋعا شاقىرىپ، اۋدان اكىمدىكتەرىنە ءاربىر شارۋاعا اقپارات جەتكىزۋدى تاپسىردى.
اۋىل شارۋاشىلىعى تاۋار وندىرۋشىلەرى جىلدىق 5 پايىزدىق مولشەرلەمەمەن نەسيە الا الادى. نەسيە مەرزىمى – 12 ايعا دەيىن. «كەڭ دالا-2» باعدارلاماسىنا وتىنىمدەر 29 ساۋىردەن باستاپ قابىلدانۋدا، وتىنىشتەر كۇن سايىن، سونىڭ ىشىندە دەمالىس كۇندەرى دە قابىلدانادى.
بۇگىنگى تاڭدا اتالعان باعدارلاما اياسىندا 600-دەن استام شارۋا قوجالىعى جالپى سوماسى 46،6 ملرد تەڭگەگە ءوتىنىم بەردى، بۇل 425،2 مىڭ گەكتار ەگىس القابىن قامتۋعا مۇمكىندىك بەرەدى.
پرەمەر-مينيستردىڭ تاپسىرماسى بويىنشا ق ر اشم، انك، قاف، ازىق-تۇلىك كورپوراسياسى وڭىرلەرگە بارىپ، اۋىل شارۋاشىلىعى تاۋارلارىن وندىرۋشىلەرگە قولداۋ كورسەتۋ شارالارىن تۇسىندىرۋدە.
سونداي-اق، تابىندى شەگىرتكەلەرگە قارسى كۇرەسكە ەرەكشە نازار اۋدارۋ قاجەت.
بۇگىندە اقمولا وبلىسىندا جوسپارلانعان وڭدەۋ الاڭى جارقايىڭ اۋدانىندا 39 مىڭ گەكتاردى قۇرايدى، ەگەر وڭدەۋ ۋاقىتىلى جۇرگىزىلمەسە، بۇل اۋماق ايتارلىقتاي ارتۋى مۇمكىن. مينيستر بارلىق قاجەتتى دارى-دارمەك ساتىپ الىنعانىن جانە قۇرال-جابدىقتار دايىن ەكەنىن اتاپ ءوتتى.