كوكشەتاۋدا مەكتەپتە جارىلعىش زاتقا ۇقسايتىن قۇرىلعى تابىلدى.
سىمدارى بار قاڭىلتىر قالبىردى مەكتەپتىڭ شارۋاشىلىق قىزمەتكەرى بايقاپ قالعان. وقيعا ورنىنا كەلگەن پوليسەيلەر 20 ءمۇعالىم مەن 10 قىزمەتكەردى ەۆاكۋاسيالاعان، دەپ حابارلايدى Almaty-akshamy.kz Qazaqstan.tv سايتىنا سىلتەمە جاساپ.
عيماراتتىڭ ءىشى مەن اۋلاسى تولىق تەكسەرىلدى. سودان كەيىن ەرەجەگە سايكەس ماماندار وزدەرى بەلىگىسىز زاتتى مەكتەپ اۋلاسىندا جارىپ جىبەردى. زارداپ شەككەندەر جوق. وقيعا كەشە كەشكە N2 مەكتەپ-ليسەيىندە بولدى.
"جەدەل ىزدەستىرۋ شارالارىنىڭ ناتيجەسىندە بەلگىسىز قۇرىلعىنى وسى مەكتەپتە وقيتىن قىز بالانىڭ جاساعانى انىقتالدى. وعان ءبىلىم ورداسىندا وقىعىسى كەلمەگەنى سەبەپ بولعان. قازىرگى ۋاقىتتا اتالعان دەرەك بويىنشا تەكسەرىس جالعاسۋدا. يۋۆەنالدى پوليسيا وقۋشىنى ەسەپكە الۋ بويىنشا شەشىم قاراستىرىپ جاتىر"، - دەيدى اقمولا وبلىستىق پوليسيا دەپارتامەنتى باسپا ءسوز قىزمەتىنىڭ وكىلى اسەم ءابدىراحمانوۆا.