كوكشەتاۋدا جالعىزباستى زەينەتكەردىڭ پاتەرىنەن ەكى ساموسۆال قوقىس شىعارىلدى. قاريانىڭ ءوزى اۋرۋحاناعا جاتقىزىلدى، دەپ حابارلايدى almaty-akshamy.kz قازاقپاراتقا سىلتەمە جاساپ.
اقمولا وبلىستىق پوليسيا دەپارتامەنتى باسپا ءسوز قىزمەتىنىڭ مالىمەتىنشە، كوكشەتاۋ قالاسى پوليسيا باسقارماسىنىڭ №4 ۋچاسكەلىك پوليسيا پۋنكتىنە تەمىرجول كوشەسىندە ورنالاسقان كوپ قاباتتى تۇرعىن ءۇيدىڭ تۇرعىندارى جۇگىنگەن.
«وبلىس ورتالىعى تۇرعىندارى قارت ايەلدىڭ پاتەرىندە انتيسانيتاريالىق جاعداي ورناۋىنا بايلانىستى كورشى تۇراتىن زەينەتكەرگە شارا قولدانۋدى سۇرادى»،-دەپ اتاپ ءوتتى ۆەدومستۆودان.
مەملەكەت باسشىسىنىڭ جولداۋىن ىسكە اسىرۋ ءۇشىن اقمولا وبلىسىندا پوليسيا جۇمىسىنىڭ سەرۆيستىك فورماتىن قامتاماسىز ەتۋ بولىگىندە كوميسسيانىڭ وسى مەكەن-جايعا شىعۋىن جۇزەگە اسىرۋ تۋرالى شەشىم قابىلداندى.
جۇمىس توبىنىڭ قۇرامىنا پوليسەيلەردەن باسقا، جەرگىلىكتى اتقارۋشى ورگانداردىڭ وكىلدەرى مەن قالانىڭ سانيتارلىق-ەپيدەميولوگيالىق قىزمەتىنىڭ ماماندارى كىردى. تەكسەرۋ بارىسىندا فاكت تولىعىمەن راستالدى.
«وبلىس ورتالىعىنىڭ 72 جاستاعى تۇرعىنى ەگدە جاسىنا جانە دەنساۋلىق جاعدايىنا بايلانىستى پاتەردى ءتيىستى دەڭگەيدە ۇستاي الماعانى انىقتالدى. تۇرعىن ۇيدە جاندىكتەر مەن كەمىرگىشتەردىڭ پايدا بولۋىنا، سونداي-اق جاعىمسىز ءيىستىڭ شىعۋىنا ىقپال ەتەتىن كوپتەگەن تۇرمىستىق قالدىقتار تابىلدى»، - دەپ تولىقتىردى ۆەدومستۆودان.
قازاقستان رەسپۋبليكاسى تاۋەلسىزدىگىنىڭ 30 جىلدىعىنا ارنالعان «30 يگى ءىس» اكسياسى اياسىندا كوكشەتاۋ قالاسى پوليسيا باسقارماسىنىڭ قىزمەتكەرلەرى جەرگىلىكتى اتقارۋشى ورگاندارمەن بىرلەسىپ بارلىق جينالعان تۇرمىستىق قالدىقتاردى جيناپ، كەيىننەن سانيتارلىق باقىلاۋ قىزمەتى ءۇي-جايدى دەزينفەكسيالادى.
بولمەنى تازارتۋ ءۇشىن ساموسۆال قولدانىلدى. ناتيجەسىندە ەكى ماشينا قوقىس جينالدى. قازىرگى ۋاقىتتا پاتەر تۇرعىنى اۋرۋحاناعا جاتقىزىلىپ، ەم الۋدا.