ءابىلحان قاستەيەۆ اتىنداعى ق ر مەملەكەتتىك ونەر مۋزەيى مەن قازاقستان ۇلتتىق بانكىنىڭ ۇيىمداستىرۋىمەن «قازاقستاندى مونەتالار ارقىلى تانى» اتتى كورمە اشىلدى.
كورمە ەلىمىزدىڭ ۇلتتىق ۆاليۋتاسىنىڭ ەنگىزىلگەنىنە 30 جىل تولۋىنا وراي ۇيىمداستىرىلعان. بۇل ەكسپوزيسيا قازاقستاننىڭ ۇلتتىق ۆاليۋتاسى اينالىمعا ەنگىزىلگەن ساتتەن باستاپ شىعارىلعان بىرەگەي مونەتالاردى ۇسىندى. ەكسپوناتتار مادەني، ساياسي جانە تاريحي ساتتەردى قامتيدى. بۇل جادىگەرلەر كورەرمەندەرگە قازىرگى قوعامنىڭ ومىرىنە اسەر ەتكەن بىرەگەي تاريحي وقيعالارمەن تانىسۋعا مۇمكىندىك بەرەدى. مونەتالار كورەرمەندەرگە حالقىمىزدىڭ مادەنيەتىن، ادەت-عۇرپىن، ءسالت-داستۇرىن پاش ەتە وتىرىپ، كوللەكسيالىق مونەتالارعا قازىرگى زامان تۇرعىسىنان جاڭاشا كوزقاراس تانىتاتىنداي.
ەگەمەندى جاس مەملەكەتتەردىڭ قاتارىنا قوسىلعان ەلىمىز بەن حالقىمىز ۇلى دالانىڭ باي تاريحىنىڭ ۇرپاعى ءارى مۇراگەرى دەسەك، قاتەلەسپەيمىز. ءبىزدىڭ جىلنامامىز ەرجۇرەك كوشپەندىلەر، ەجەلگى ساقتار داۋىرىنەن، جارتاستارعا العاشقى پەتروگليفتەردى قالدىرعان قولونەرشىلەردەن باستاۋ الادى. بۇل – الەمدىك تاريحتىڭ وراسان زور بولىگى.
– سول زاماننان باستاپ سوعىلعان كونە تەڭگەلەر بۇگىنگى كۇنگە دەيىن جەتكەن. ولار كونە ءداۋىردىڭ سىرىن اشىپ قانا قويماي، ۇلتتىق بانك ديزاينەرلەرىن وتكەن داۋىرلەردىڭ ءتۇسى مەن رۋحىن، سونداي-اق زاماناۋي يننوۆاسيالىق تەحنولوگيالاردىڭ كۇشى مەن مانەرلىلىگىن بويىنا سىڭىرەتىن زاماناۋي مونەتالاردى جاساۋعا شابىتتاندىردى. ولاردى پايدالانۋ ناتيجەسى سۋرەتشىلەردىڭ تۇپكى ويىن تولىعىمەن جۇزەگە اسىرۋعا جانە مونەتالاردىڭ مانەرلىلىگى مەن سۇلۋلىعىنا قول جەتكىزۋگە مۇمكىندىك بەردى، – دەيدى كورمە جەتەكشىسى اقجىگىت ءنۇسىپ.
كورمەدە جاڭا KOKBÓRI ينۆەستيسيالىق مونەتالارى تانىستىرىلدى. قازىرگى ۋاقىتتا ينۆەستيسيالىق مونەتالار نارىعىنداعى جاھاندىق ۇردىستەر ديزاينى ايرىقشا كوللەكسيالىق جانە سىيعا تارتىلاتىن مونەتالارعا باعىتتالعان. وسىعان وراي، قازاقستاننىڭ ينۆەستيسيالىق مونەتالار نارىعىن وزەكتەندىرۋ، ولاردى تانىمال ەتۋ جانە حالىقارالىق نارىقتا ىلگەرىلەتۋ ماقساتىندا قازاقستان ۇلتتىق بانكى ALTYN BARYS جانە KUMIS BARYS اتتى ينۆەستيسيالىق مونەتالارىنا رەبرەندينگ جاسادى.
جاڭا KOKBÓRI ينۆەستيسيالىق مونەتالارىندا «كوشپەندىلەردىڭ قاسيەتتى جانۋارلارى – توتەمدەرى» اتتى مونەتالار سەرياسىنىڭ ديزاين ءستيلى پايدالانىلعان، ولاردىڭ جوعارى تانىمالدىلىعى قىسقا مەرزىمدە قازاقستاننىڭ «توتەمدىك» ينۆەستيسيالىق مونەتالارىنىڭ وزىندىك بىرەگەي برەندىن جاسايدى.
