سپورتشىلارىمىزعا كۇش بەرىپ، بيىكتەردەن كورىنەدى دەپ سەنەمىز!
ازيادا، حانچجوۋ-2022: وليمپيادالىق قالاشىقتا قازاقستاننىڭ تۋى رەسمي كوتەرىلدى حانچجوۋ قالاسىندا قازاقستان تۋىن كوتەرۋدىڭ سالتاناتتى ءراسىمى ءوتتى، دەپ حابارلايدى Almaty-akshamy.kz.
بۇل ءىس-شارا قازاقستاندىق سپورت دەلەگاسياسىنىڭ ازيا ويىندارىنا رەسمي تۇردە كەلگەنىن بىلدىرەدى. ق ر ۇوك سپورت ديرەكسياسىنىڭ ديرەكتورى ەلسيار قاناعاتوۆ سپورتشىلاردى ءحىح ازيا ويىندارىندا ەل نامىسىن لايىقتى قورعاۋ كەرەكتىگىن جەتكىزدى.
«جارىستى ۇيىمداستىرۋ جوعارى دەڭگەيدە، وليمپيادا ويىندارىنان كەم تۇسپەيدى. قازاقستاندىق دەلەگاسيانىڭ ءبىر بولىگى قىتايعا كەلىپ، اتلەتتەر اۋىلىنا ورنالاستى. وزدەرىڭىز بىلەسىزدەر، ازيا ويىندارى ءبىزدىڭ قۇراما ءۇشىن وتە ماڭىزدى. ويتكەنى مۇندا مەدالدار عانا ەمەس، بىرنەشە سپورت تۇرىنەن وليمپيادا ليسەنزيالارى دا وينالادى. سپورتشىلارىمىز جاقسى ونەر كورسەتەدى دەپ ۇمىتتەنەمىز»، - دەدى ەلسيار قاناعاتوۆ رەسمي راسىمنەن كەيىن.
ق ر تسم سپورت جانە دەنە شىنىقتىرۋ ىستەرى كوميتەتى سپورتتى دامىتۋ ديرەكسياسىنىڭ ديرەكتورى ورالباي جاقسىمبەتوۆ تە سپورتشىلارعا ساتتىلىك تىلەپ، ولاردىڭ بارلىعىنا قۇرلىقتىق جارىسقا ساپالى دايىندالۋ ءۇشىن بارلىق جاعداي جاسالعانىن اتاپ ءوتتى.
«ازيا ويىندارى – بۇل قۇرلىقتىق وليمپيادا. مۇندا سارى قۇرلىقتىڭ ۇزدىك سپورتشىلارى جينالادى. ءبىز قالاشىقتا سپورتشىلارمەن بىرگە تۇرىپ، ولاردىڭ ەش نارسەگە مۇقتاج بولماۋىن جەكە باقىلاۋدامىز. ۇلتتىق قۇراما تولىقتاي جابدىقتالعان. ويىندارعا دايىندىق ءبىز ويلاعانداي ءوتتى. كەدەرگىلەر جوق. كوماندامىزعا ساتتىلىك پەن جەڭىستەر تىلەيمىن»، - دەدى ورالباي جاقسىمبەتوۆ.
سالتاناتتى شاراعا بوكستان قازاقستان قۇراماسىنىڭ ۇزدىكتەرىنىڭ ءبىرى ساكەن بيبوسىنوۆ قاتىستى. سپورتشى ماراپاتتاۋ ءراسىمى كەزىندە كوك بايراعىمىزدىڭ تاعى جەلبىرەۋى ءۇشىن قولدان كەلگەننىڭ ءبارىن جاساۋعا ۋادە بەردى.
«بۇل مەن ءۇشىن ءبىرىنشى ازيا ويىندارى. ءبىز قاتىساتىن سپورت تۇرىنەن وليمپيادالىق ليسەنزيالار ساراپقا سالىنادى. ولار تەك فيناليستەرگە بەرىلەدى. سوندىقتان باسەكەلەستىك وتە جوعارى بولادى. مەن تەك جوعارى ناتيجەگە جەتۋدى ماقسات ەتەمىن. ال ءبىزدىڭ بارلىق بوكسشىلار مۇندا جەڭىس پەن ليسەنزيا ءۇشىن كەلدى. جەتىستىككە جەتەتىنىمىزگە سەنەمىز»، – دەيدى سپورتشى.
جازعى ازيا ويىندارىنىڭ رەسمي اشىلۋ سالتاناتى 23 قىركۇيەكتە وتەدى.
بۇعان دەيىن جازعانىمىزداي قازاقستان قۇراماسى ساپىندا 524 سپورتشى ب ا ق سىنايدى. ولار 40 سپورت ءتۇرىنىڭ 30 ءتۇرى بويىنشا ونەر كورسەتەدى. وتاندىق سپورتشىلار 44 ديسيپلينا بويىنشا جۇلدەلى ورىندارعا تالاسىپ، 305 مەدال جيىنتىعىن ساراپقا سالادى. جالپى ازيا ويىندارىندا 61 ديسيپلينا بويىنشا بارلىعى 481 مەدال جيىنتىعى ويناتىلادى.