18 تامىز – سپورت كۇنى. بۇل مەرەكە – جەڭىس جولىندا ماڭداي تەرىن توگىپ، قازاقستاننىڭ اتىن الەمگە تانىتقان باتىر سپورتشىلارعا ارنالعان. وسىعان وراي اqshamnews.kz ءتىلشىسى ەل ماقتانىشىنا اينالعان چەمپيونداردىڭ جەڭىستى جولىنا شولۋ جاسادى.
قازاقستان تاۋەلسىز العان ساتتەن باستاپ الەمدىك سپورت ساحناسىندا ءوز اتىن التىن ارىپپەن جازىپ كەلەدى. ءار وليمپيادا، ءار دودا – تاريحىمىزدىڭ جاڭا بەلەسى، سپورتشىلارىمىزدىڭ ەرىك-جىگەرى مەن قايسارلىعىنىڭ دالەلى بولدى.
1994 جىلى ليللەحاممەردەگى وليمپيادادا ۆلاديمير سميرنوۆ ەل تاريحىنداعى قىسقى وليمپيادانىڭ تۇڭعىش چەمپيونى اتاندى. ول سپورت جولىندا قازاقستان قورجىنىنا جەتى بىردەي وليمپيادا جۇلدەسىن (1 التىن، 4 كۇمىس، 2 قولا) جانە الەم چەمپيوناتتارىنان 11 مەدال سىيلاپ، اڭىزعا اينالدى.
2000 جىلى بەكزات ساتتارحانوۆ نەبارى 20 جاسىندا سيدنەي وليمپياداسىندا ەلىمىزدىڭ ەڭ جاس چەمپيونى رەتىندە التىننان القا تاقتى. ال يۋريي مەلنيچەنكو 1996 جىلى اتلانتادا گرەك-ريم كۇرەسىنەن قازاقستاننىڭ جازعى وليمپياداداعى تۇڭعىش چەمپيونى بولىپ، سپورت تاريحىنا جازىلدى.
ەلىمىز ءىرى سپورت دودالارىن قابىلداۋدا دا ايقىن قادام جاسادى: 2011 جىلعى قىسقى ازيا ويىندارى، 2017 جىلعى ۋنيۆەرسيادا، ال 2024 جىلى — دۇنيەجۇزىلىك كوشپەندىلەر ويىندارى. بۇل باسەكەلەردە قازاقستان رەكورد التىن جۇلدەلەرگە قول جەتكىزدى.
ءبىزدىڭ چەمپيوندارىمىز – ناعىز كوپقىرلى جۇلدىزدار. ۆلاديمير سميرنوۆ، ولگا رىپاكوۆا مەن ەلدوس سمەتوۆ وليمپيادادا التىننان باستاپ قولاعا دەيىن تولىق مەدال جيىنتىعىن يەلەنگەن ساناۋلى سپورتشىلار قاتارىندا. ال يليا ءيليننىڭ ءتورت دۇركىن الەم چەمپيونى اتانۋى قازاقستاندى اۋىر اتلەتيكا دەرجاۆاسىنا اينالدىردى.
وليمپيادانىڭ التىن تاريحىندا الەكساندر پارىگين (1996، بەسسايىس) مەن الەكساندر ۆينوكۋروۆ (2012، ۆەلوسپورت) جالعىز چەمپيون اتانعان سپورتشىلار رەتىندە ەرەكشەلەنەدى.
مانەرلەپ سىرعاناۋدا دەنيس تەن سوچيدە قولا جۇلدە ەنشىلەپ، الەم الدىندا قازاقستاندى پاش ەتسە، ەليزابەت تۇرسىنبايەۆا 2019 جىلى ءتورت اينالىم سەكىرگەن تۇڭعىش سپورتشى اتانىپ، ەلگە تاريحي كۇمىس سىيلادى.
كوماندالىق سپورتتا دا بيىك بەلەستەر باعىندىرىلدى: "شاحتەر" 2013 جىلى ەۋروپا ليگاسىنىڭ توپتىق كەزەڭىنە شىققان تۇڭعىش قازاق كومانداسى بولسا، "استانا" 2015 جىلى چەمپيوندار ليگاسىندا ونەر كورسەتتى. فۋتزالدان ۇلتتىق قۇراما 2021 جىلى الەم چەمپيوناتىنىڭ جارتىلاي فينالىنا دەيىن جەتىپ، سەنساسيا جاسادى.
كەيىنگى جىلدارى قازاقستاندا جاڭا جۇلدىزدار پايدا بولدى. ەلەنا رىباكينا 2022 جىلى Wimbledon تۋرنيرىندە جەڭىسكە جەتىپ، ەل اتىن تورتكۇل دۇنيەگە تاعى تانىتتى. ال ريزابەك ايتمۇحان 2023 جىلى ەركىن كۇرەستەن الەم چەمپيونى اتانىپ، نەبارى 19 جاسىندا ەل تاريحىنداعى ەڭ جاس پالۋان بولدى.
2024 جىلى شاحماتتان قازاقستان ايەلدەر قۇراماسى تۇڭعىش رەت وليمپيادادا كۇمىس مەدال يەلەنىپ، تاريحتا التىن ارىپپەن جازىلدى. بۇل جەڭىستى ءبيبىسارا اساۋبايەۆا، مەرۋەرت كاماليدەنوۆا، ءامينا قايىربەكوۆا، كسەنيا بالابايەۆا مەن الۋا نۇرمان تارتۋ ەتتى.
ال بيىل الماتىنىڭ "قايرات" فۋتبول كلۋبى ءوز تاريحىندا العاش رەت ۋەفا چەمپيوندار ليگاسىنىڭ پلەي-وفف كەزەڭىنە جولداما الدى. ءۇشىنشى ىرىكتەۋ كەزەڭىنىڭ جاۋاپ ماچىندا رافاەل ۋرازباحتين جاتتىقتىراتىن كوماندا سلوۆاكيالىق "سلوۆاندى" جەڭىپ، تاريحي جەتىستىككە جەتتى.
وسىلايشا، "قايرات" چەمپيوندار ليگاسىنداعى كەزدەسۋىن جالعاستىرىپ، پلەي-وفف كەزەڭىندە شوتلانديالىق "سەلتيكپەن" كەزدەسەدى. العاشقى ماچ 20 تامىزدا گلازگودا، ال جاۋاپ ويىنى 26 تامىزدا الماتىداعى ستاديوندا وتەدى.