الماتىدا ەرەكشە كىتاپحانا اشىلدى
ادامدار ءار كۇنى كوفە ساتىپ الىپ ءىشۋى مۇمكىن، ءبىراق ءار كۇنى كىتاپ ساتىپ الا بەرمەيدى. ال كوفە مەن كىتاپتى بىرلەستىرۋ قوعامدا كىتاپقۇمار ادامداردىڭ قاتارىن مولايتۋعا كومەكتەسەدى. مىنە وسى يدەيادان الماتىدا ەرەكشە كىتاپحانا وقىرماندارعا ءوز ەسىگىن اشتى. «كىتاپ كوفەحاناسىنىڭ» اشىلۋى بۇگىن، 23 ءساۋىر حالىقارالىق كىتاپ كۇنىنە وراي وتكىزىلدى دەپ حابارلايدى Almaty-aqshamy.kz.
وقىرمان مادەنيەتىن قالىپتاستىرۋعا اسەر ەتەرلىك باستامانى «مازمۇنداما» باسپاسى جۇزەگە اسىرعان. كىتاپحانا مەن كوفەحانانى بىرلەستىرگەن ورتالىق Coffe Book دەپ اتالادى. وندا اتالمىش باسپادان جارىق كورگەن بارلىق كىتاپتاردى تابۋعا بولادى. بۇگىنگى اشىلۋ سالتاناتىنا الماتىداعى كىتاپسۇيەر جۇرتشىلىقپەن قاتار زيالى قاۋىم وكىلدەرى، قالامگەرلەر جينالدى.
جوبا جەتەكشىسى شىڭعىس مۇقان «كىتاپ كوفەحاناسى» جايىندا: «ماقساتىمىز كوفە ساتۋ ەمەس ەدى... وقىرماندارىمىز "Mazmundama" باسپاسىنىڭ بارلىق كىتاپتارىن تابا الاتىن كىتاپ دۇكەنىن اشقىمىز كەلگەن. ەسەپتەپ قاراساق، تازا كىتاپ دۇكەنى ءوزىن (قارجىلىق تۇرعىدا) اقتاي قويمايتىن بولىپ شىقتى. سودان، كوفەحانا مەن كىتاپ دۇكەنىنىڭ باسىن قوسايىق دەپ شەشتىك. ناتيجەسىندە Coffe Book دۇنيەگە كەلدى»، – دەيدى ءوزىنىڭ الەۋمەتتىك جەلىدەگى پاراقشاسىندا.
الماتىلىقتارعا اشىلعان «كىتاپ كوفەحاناسى» كىتاپ ساتىپ الۋشىلارعا تەگىن كوفە ۇسىنباق. بۇل ارقىلى كىتاپ الارماندارىن ىنتالاندىرۋدى كوزدەيدى. مۇنداي اكسيانى اپتا سوڭىنا دەيىن جالعاستىرىپ، الماتىلىق كىتاپقۇمارلاردىڭ نازارىن وزىنە اۋدارماق. جوبا اۆتورلارى ەلدەگى كىتاپ مادەنيەتىن قالىپتاستىرۋ، وقىرمان قاتارىن مولايتۋدى كوزدەگەن. بۇل ءۇشىن «مازمۇنداما» ۇجىمى 2050 جىلعا دەيىن 500-گە جۋىق ءتۇرلى فورماتتاعى كىتاپ ورتالىقتارىن اشۋدى ماقسات ەتىپ وتىر.
ءبىر حالىقتىڭ كىتاپپەن بولعان قارىم-قاتىناسى سول ەلدىڭ عىلىم-بىلىمگە دەگەن قارىم-قاتىناسىن ايقىندايدى. الايدا، ەلىمىزدە كىتاپ وقىرماندارىنىڭ ازدىعى كوپتەن ايتىلىپ كەلە جاتقان تاقىرىپ. بۇل تاقىرىپ ناۋرىزدا وتكەن ۇلتتىق قۇرىلتايدىڭ ءۇشىنشى وتىرىسىندا دا كوتەرىلگەن بولاتىن. مەملەكەت باسشىسى كىتاپ پەن بىلىمگە اۋەس جاڭا بۋىندى تاربيەلەپ جەتىلدىرۋ ۇلت ساپاسىن جوعارىلاتۋدىڭ باسىم ءبىر باعىتى بولارىن جەتكىزگەن ەدى.
سوڭعى جىلدارى وقىرمان قالىپتاستىرۋ، اۋدارما، باسپا ءىسى، كىتاپ بيزنەسى ەلىمىزدە بىرتىندەپ دامىپ جاتقانى بايقالادى. بۇعان جەكەلەگەن باستاماشىل تۇلعالار مەن ۇجىمداردىڭ اتقارعان ىستەرى دە ءوز اسەرىن بەرۋدە. وسى ورايدا ايتا كەتەيىك، 2018 جىلدان بەرى جۇمىس ىستەپ كەلە جاتقان "Mazmundama" باسپاسى ەلدەگى كىتاپ مادەنيەتىن قالىپتاستىرۋداعى بىرەگەي جوبالاردىڭ ءبىرى. قازىرگە دەيىن 400-دەن استام كىتاپتى قازاقستاندىق وقىرمان قاۋىمىنا ۇسىنعان بولاتىن.
