كىتاپ پاتشالىعىنداعى مەرەكە: الماتىدا قالا كۇنىنە وراي اۋقىمدى كىتاپ فەستيۆالى ءوتتى.
9 قىركۇيەكتە الماتىدا BAURZHAN foundation قورى ۇيىمداستىرعان Kitap Fest Almaty كىتاپ فەستيۆالى ءوتتى. قازاقستاننىڭ حالىقارالىق دەڭگەيدەگى العاشقى كىتاپ فەستيۆالى بولىپ تابىلاتىن مادەني-بۇقارالىق ءىس-شارا الماتى قالاسى اكىمدىگى مادەنيەت باسقارماسىنىڭ جانە الماتى قالاسىنىڭ ورتالىقتاندىرىلعان كىتاپحانا جۇيەسىنىڭ قولداۋىمەن 2014 جىلدان باستاپ جىل سايىن وتكىزىلىپ كەلەدى، دەپ حابارلايدى Almaty-akshamy.kz.
BAURZHAN قورىنىڭ قۇرىلتايشىسى، كىتاپ فەستيۆالىنىڭ نەگىزىن قالاۋشى جۇلدىز وماربەكتىڭ ايتۋىنشا، Kitap Fest-شىعارماشىل جانە دارىندى ادامدارعا ارنالعان بىرەگەي الاڭ. بيىل قالا كۇنىنە تۇسپا-تۇس كەلگەن Kitap Fest Almaty فەستيۆالىنىڭ تاقىرىبى: «ۇلتتىق ادەبيەت. ۇلتتىق ءتىل. ۇلتتىق داستۇرلەر».
«9 جىل ىشىندە Kitap Fest الماتىلىقتار ءۇشىن ەڭ سۇيىكتى شاراعا اينالدى. ەلوردا كۇنىنە وراي ءبىز شىلدە ايىندا كىتاپ فەستيۆالىن استانا قالاسىندا ەكىنشى رەت وتكىزدىك. وقۋ مادەنيەتىن ىلگەرىلەتۋگە ارنالعان ءبىزدىڭ فەستيۆال، جازۋشىلار مەن ولاردىڭ وقىرماندارى ءۇشىن ءبىرىڭعاي الاڭ قۇرىپ، بالالار مەن جاستار اراسىندا كىتاپقا دەگەن قىزىعۋشىلىقتى ارتتىرۋ بولىپ تابىلادى. كىتاپ فەستيۆالى-قازاقستاندىق جازۋشىلارمەن كەزدەسۋلەردەن باستاپ بالالارعا ارنالعان تانىمدىق شەبەرلىك ساباقتارىنا دەيىنگى ينتەراكتيۆتى ورتا. ءبىز حالىقتى وقۋعا تارتۋ، كىتاپتىڭ، مادەنيەت پەن ءبىلىمنىڭ ماڭىزىن ارتتىرۋ، قازاقستاندىق جازۋشىلار مەن ولاردىڭ ادەبي شىعارمالارىن ناسيحاتتاۋعا جاردەمدەسۋ ءۇشىن جۇمىس ىستەپ جاتىرمىز»، - دەپ اتاپ ءوتتى Kitap Fest كىتاپ فەستيۆالىنىڭ باس ۇيلەستىرۋشىسى مايرا ءالجانوۆا.
الماتى كىتاپ فەستيۆالى كىتاپ سۇيەر قاۋىم ءۇشىن اۋقىمدى باعدارلاما دايىندادى: وتاندىق جازۋشىلار جاڭا كىتاپتارىن تانىستىردى. «وففلاين كىتاپتار تۋرالى» شاتىرىندا تانىمال جازۋشىلار، قوعام قايراتكەرلەرى مەن بلوگەرلەر پىكىر الماستى. الماتىلىقتارعا يلليۋستراسيالانعان كىتاپ كورمەسى، شەبەرلىك سىنىپتارى، ءتۇرلى بايقاۋلار مەن اكسيالار، قازاقستاننىڭ ءىرى باسپالارى مەن كىتاپ دۇكەندەرىنىڭ جارمەڭكەسى ۇسىنىلدى. باسپاگەرلەر جانە كىتاپ دۇكەندەرى ءوز ونىمدەرىن كورمەدە 30% - عا دەيىنگى جەڭىلدىكپەن ساتتى. بيىلعى جىلى كىتاپ فەستيۆالىندە 50-دەن استام كىتاپ دۇكەندەرى مەن باسپالار ءوز ونىمدەرىن ۇسىندى. 28 جاڭا كىتاپتىڭ تۇساۋى كەسىلدى.
فەستيۆالدە 40-قا جۋىق پىكىر كوشباسشىلارى ءسوز سويلەدى: دوسىم ساتبايەۆ، ءدىلدار مامىربايەۆا، ەلدوس توقتارباي، بەيبىت سارىباي، سماعۇل ەلۋباي، ابىلاي يۋسۋپوۆ، مۇحامەدجان تازابەك جانە باسقا دا كوپتەگەن تانىمال تۇلعالار قازىرگى ادەبيەتتەگى ءۇردىس جايلى ءسوز قوزعادى. سونداي-اق، جازۋشىلار «مەنىڭ العاشقى ەرتەگىلەرىم»، «كاك وسەدلات ەدينوروگا؟»، «Tarmaqtar» جانە باسقا دا جاڭا كىتاپتاردىڭ تۇساۋكەسەرى ءوتتى.
بەلگىلى قازاقستاندىق قوعام قايراتكەرى، ساياساتتانۋشى، پۋبليسيست، باسپاگەر دوسىم ساتبايەۆ پاۆەل كوكتىشيەۆ جانە ءالىم حاميتوۆپەن بىرگە «كاك وسەدلات ەدينوروگا؟» كىتابىنىڭ تۇساۋىن كەستى. ونىڭ پىكىرىنشە، ونجىلدىقتا Kitap Fest شىعارماشىل تۇلعالار مەن كىتاپسۇيەر ءۇشىن بەدەلدى جانە قۋاتتى الاڭعا اينالدى.
«جاڭا قازاقستانعا وقيتىن جانە ءبىلىمدى جاستار قاجەت. سوندىقتان مۇنداي ءىس-شارالاردى وتكىزۋ وتە ماڭىزدى. كىتاپ وقيتىن ادام سانا كوكجيەگىن كەڭەيتەدى، لوگيكاسىن، ويلاۋىن دامىتادى، ەستە ساقتاۋ قابىلەتىن جاقسارتادى. وسى رەتتە، Kitap Fest كوپتەگەن ادامداردى بىرىكتىرىپ قانا قويماي، جاڭا مۇمكىندىكتەرگە جول اشىپ ءجۇر. سىزدەرگە قاجىرلىقپەن قاتار، كىتاپ وقۋدى ناسيحاتتاۋ، وقۋ مادەنيەتىن قالىپتاستىرۋ جولىندا زور تابىستار تىلەيمىن»- دەدى جازۋشى.
سونىمەن قاتار، فەستيۆال قوناقتارى اكەلىنگەن كىتاپتارمەن الماسۋعا، ۇناعان كىتاپتاردى جەڭىلدىكپەن ساتىپ الۋعا نەمەسە ولاردى تولىعىمەن تەگىن الۋعا مۇمكىندىك الدى. بيىلعى جىلى كىتاپ فەستيۆالىندە ءار ءتۇرلى جانرداعى 5000 كىتاپ كەلۋشىلەرگە تەگىن تاراتىلدى.
بالالارعا ارنالعان ويىن-ساۋىق باعدارلاماسىندا انيماتورلار، اكۆاگريم مەن ءتۇرلى قىزىقتى بايقاۋلار مەن ۆيكتورينالار كەلگەن قوناقتارعا تاماشا كوڭىل-كۇي سىيلادى.
ءداستۇر بويىنشا فەستيۆالدە «اۋىلعا كىتاپ» اكسياسى وتكىزىلدى، وندا كەز-كەلگەن وقىرمان ءوز كىتابىن اكەلىپ، قازاقستاننىڭ اۋىلدىق كىتاپحانالارىنا تاپسىرۋعا ات سالىستى. بيىلعى فەستيۆالدە 3 مىڭعا تارتا كىتاپ جينالدى.
ايتۋ كەرەك، كitap Fest كىتاپ فەستيۆالى-2014 جىلدان بەرى جىل سايىن وتكىزىلىپ كەلە جاتقان ەڭ اۋقىمدى مادەني-بۇقارالىق ءىس-شارا. 9 جىل ىشىندە ول شىعارماشىلىق كەزدەسۋلەردىڭ نەگىزگى الاڭىنا اينالدى، وندا اۆتورلار مەن باسپالاردىڭ قاتىسۋىمەن 200-دەن استام كىتاپتاردىڭ تۇساۋكەسەرى ءوتىپ، جارمەڭكەلەرگە 300-گە جۋىق كىتاپ دۇكەنى قاتىستى. جىل سايىن كىتاپ فەستيۆالىنىڭ ارقاسىندا 5000 مىڭ كىتاپ تەگىن تاراتىلادى. ق ر ۇلتتىق مەملەكەتتىك كىتاپ پالاتاسىنىڭ ستاتيستيكاسى كەلتىرسەك: 2022 جىلى قازاقستاندا كىتاپتار مەن بروشيۋرالاردىڭ 4044 اتاۋى تىركەلگەن. ەڭ كوپ كىتاپتار مەن بروشيۋرالار الماتى، الماتى وبلىستارىندا شىعارىلدى. 1749 كىتاپ پەن بروشيۋرا تىركەلگەن. ەلىمىزدەگى كىتاپتاردىڭ باسىم بولىگى پەداگوگيكا سالاسىندا (ادىستەمەلىك قۇرالدار، كىتاپتار) جارىق كوردى. كىتاپتار سانى 1085. كوركەم ادەبيەت جانرى بويىنشا: قازاق ادەبيەتى-664، پوەزيا -166، دراما -3، پروزا - 286.