الماتىدا «BAURZHAN Foundation» قورىنىڭ قولداۋىمەن جانە الماتى قالاسى اكىمدىگىنىڭ مادەنيەت باسقارماسى مەن ورتالىقتاندىرىلعان كىتاپحانا جۇيەسىنىڭ ۇيىمداستىرۋىمەن «Kitap Fest» كىتاپ فەستيۆالى ءوتتى.
«Kitap Fest» – جىل سايىن ەلىمىزدەگى ءىرى مەگاپوليستە كىتاپ سۇيەر قاۋىمدى بىرىكتىرەتىن الماتىلىقتاردىڭ ومىرىندەگى ايتۋلى مادەني-بۇقارالىق شارا. 2014 جىلدان بەرى ۇيىمداستىرىلىپ كەلە جاتقان فەستيۆال بيىل ءوزىنىڭ 10 جىلدىق مەرەيتويىن اتاپ وتۋدە. بيىلعى فەستيۆال ءداستۇرلى تۇردە قالا كۇنىنە ورايلاستىرىلعان.
«Kitap Fest» – قازاقستانداعى العاشقى جانە ەڭ ءىرى كىتاپ فەستيۆالى. 10 جىل ىشىندە بۇل شاراعا 70-تەن استام باسپا مەن كىتاپ دۇكەندەرى قاتىسىپ، 500-گە جۋىق جاڭا كىتاپ تانىستىرىلدى. بيىل فەستيۆال ەرەكشە باعدارلاما ۇسىندى: ول ەكى كۇنگە سوزىلىپ، «كەلەشەك كىتابى» تاقىرىبىندا ءوتتى.
كەلۋشىلەردى اۋقىمدى مادەني باعدارلاما، قازاقستاندىق اۆتورلارمەن كەزدەسۋ، جاڭا كىتاپتاردىڭ تۇساۋكەسەرى، شەبەرلىك سىنىپتارى، بايقاۋلار جانە بالالارعا ارنالعان تانىمدىق باعدارلامالار كۇتتى. سونىمەن قاتار، وتاندىق باسپاگەرلەر مەن كىتاپ دۇكەندەرىنىڭ قاتىسۋىمەن ۇلكەن كىتاپ جارمەڭكەسى ۇيىمداستىرىلدى. فەستيۆال اياسىندا «اۋىلعا كىتاپ» ءداستۇرلى اكسياسى دا ءوتتى، وندا قالا تۇرعىندارى اۋىلدىق كىتاپحانالارعا كىتاپتار سىيلادى.
«Kitap Fest Almaty 2024» اياسىندا جاڭا كىتاپتاردىڭ تۇساۋكەسەرى ءوتىپ، «جازۋشىلار شاتىرى» جانە «قازاق قالامگەرلەرى» الاڭىندا قازاق ادەبيەتىنىڭ دامۋى تۋرالى پىكىرلەر ايتىلدى. سونداي-اق، «ZHAS ALASH» شاتىرىندا جاس كوشباسشىلار كىتاپ وقۋدىڭ پايداسى تۋرالى وي بولىسسە، «Kitap FEST WOMEN» الاڭىندا ءارتۇرلى سالادا جەتىستىككە جەتكەن ايەلدەر تابىسقا جەتۋدىڭ قۇپيالارىن ءبولىستى.
كىتاپ جارمەڭكەسىندە 60 جەتەكشى باسپا مەن كىتاپ دۇكەندەرى ءوز ونىمدەرىن 40%-عا دەيىنگى جەڭىلدىكپەن ۇسىندى. سونىمەن قاتار، سيرەك كىتاپتار كورمەسى مەن يلليۋستراتورلار كورمەسى دە ۇيىمداستىرىلدى، وندا ۇزدىك 35 يلليۋستراتوردىڭ جۇمىستارى قويىلدى. «وقىرمان ۇلتتىڭ ۇرپاعىمىز» كورمەسىندە مەرەيتويلارى اتالىپ وتىلەتىن تۇلعالاردىڭ ارحيۆتىك فوتوسۋرەتتەرىنەن فوتوكوللاجدار جاسالدى.
فەستيۆال اياسىندا زياتكەرلىك ويىندار، بالالارعا ارنالعان ويىن-ساۋىق شارالارى جانە 1 ميلليون تەڭگە كولەمىندە كىتاپ سەرتيفيكاتتارىن ۇتىسقا سالۋ سىندى ءتۇرلى ءىس-شارالار ۇيىمداستىرىلدى.
«وتباسى حرەستوماتياسى» جوباسىنىڭ اۆتورى، جازۋشى-عالىم سانجار كەرىمباي قازىرگى كىتاپ نارىعى مەن وقىرماندار جايلى: «ءقازىر دە كىتاپ وقىلادى. ەگەر جازۋشى وقىرماننىڭ جۇرەگىنە جول تاۋىپ، ولاردىڭ سۇراقتارىنا جاۋاپ بەرە السا، شىعارمالارى ءوتىمدى بولادى»، – دەدى.
كورمەگە كەلگەن وقىرماندار ءوز ويلارىمەن ءبولىسىپ، كىتاپقا دەگەن قىزىعۋشىلىقتىڭ ارتىپ كەلە جاتقانىن ايتتى. «بۇرىن كىتاپتى جاتا-جاستانا وقيتىنبىز. ءقازىر نەمەرەلەرگە كىتاپ وقىتۋ قيىن، دەگەنمەن سوڭعى ۋاقىتتا جاقسى شىعارمالار شىعا باستادى، سوندىقتان بالالاردا كىتاپقا دەگەن قىزىعۋشىلىق ارتىپ كەلەدى»، – دەپ ويىمەن ءبولىستى وقىرمان قۇرمانبەك قالداروۆ.