الەۋمەتتىك جەلىدە «كىندىككە ماي جاعىپ، كوپ اۋرۋدى ەمدەۋگە بولادى» دەگەن جالعان اقپارات تاراۋدا، دەپ حابارلايدى almaty-akshamy.kz stopfake.kz سىلتەمە جاساپ.
كىندىككە ءارتۇرلى ماي جاعىپ، بۋىن اۋرۋلارىن، ساڭىراۋقۇلاقتاردى ەمدەۋگە، كورۋ قابىلەتىن تۇزەتۋگە، تەرى مەن شاشتىڭ ساپاسىن جاقسارتۋعا بولادى ەكەن. بەلگىسىز دارىگەردىڭ اتىنان وسىنداي ەرەكشە كەڭەس تاراۋدا. بۇعان عىلىمي نەگىز بار ما؟ انىقتايىق.
كىندىك – بۇل ءار ادامنىڭ دەنەسىندەگى العاشقى تىرتىق. ءبىز ءالى قۇرساقتا بولعان كەزدە ول دەنەمىز پلاسەنتاعا كىندىك ارقىلى قوسىلعان جەردە قالادى. كىندىكتىڭ وزىندە كوكتامىر جانە ەكى كىندىك ارتەرياسى بولادى. ءبىرىنشىسى ۇرىققا وتتەگىمەن بايىتىلعان قان جەتكىزەدى. ەكىنشىسى ارقىلى بالانىڭ قالدىقتارى مەن كومىرقىشقىل گازى اناسىنا قايتارىلادى.
تۋعاننان كەيىن كىندىك قالدىقتارى كەۋىپ، ءتۇسىپ قالادى. كىندىكتىڭ كوكتامىرى باۋىردىڭ دوڭگەلەك بايلامىن قۇرايدى.
جالپى، كىندىك ەرەسەك ادامنىڭ اناتومياسى ءۇشىن ماڭىزدى ەمەس. ول ەستەتيكالىق فۋنكسيانى اتقارىپ، دارىگەرلەرگە ءىشتى كوزبەن سەكتورلارعا ءبولۋ ءۇشىن قاجەت. سونداي-اق لاپاروسكوپيالىق وپەراسيالار كەزىندە كىندىك كەرەك ورگاندارعا تەز جانە تىكەلەي قول جەتكىزۋ ءۇشىن تەسىك رەتىندە قولدانىلۋى مۇمكىن.
حالىقتىق مەديسينادا كىندىككە ەفير مايلارىن جاعۋ ارقىلى تەرىنىڭ ساپاسىن جاقسارتۋعا، تەرى اۋرۋلارىن ەمدەۋگە، شاشتىڭ ءتۇسۋىن توقتاتۋعا جانە كورۋ قابىلەتىن تۇزەتۋگە بولادى دەگەن پىكىر قالىپتاسقان. كەيبىر دەرەككوزدەرد كىندىككە جاعىلعان نيما مايى كونتراسەپتيۆ قىزمەتىن اتقارادى دەلىنگەن.
ءبىراق ءارتۇرلى دەرەككوزدەردە ءارتۇرلى مايلاردىڭ بىردەي قاسيەتتەرى سيپاتتالعان. مىسالى، قازنەتتە قىشا مايى باس اۋرۋىن ەمدەيدى دەپ جازىلسا، رەسەيلىك سايتتاردا ونى كىندىككە جاقسا، قۇرعاق تەرى جاقسارادى دەلىنگەن.
جالپى، كىندىككە ماي جاقسا، ونىڭ قانداي دا ءبىر كومەگى بولاتىنىنا دالەل جوق. بۇل تاقىرىپ بويىنشا زەرتتەۋلەر جۇرگىزىلمەگەن، كىندىك كورۋ ورگاندارىمەن، بۋىندارمەن بايلانىستى ەمەس، سونىمەن قاتار ساڭىراۋقۇلاق ينفەكسيالارىنا دا اسەر ەتە المايدى. سونداي-اق كونتراسەپسيا رەتىندە ەفير مايىنا سەنىم اتپاعان ءجون. بۇل ءادىس تە، كوپتەگەن باسقا «حالىقتىق» ادىستەر سياقتى، عىلىمي تۇرعىدان راستالماعان.
قۇرعاق ەرىن، شاش جانە تەرىگە كەلەتىن بولساق، دەرماتولوگپەن كەڭەسكەننەن كەيىن مايلاردى تىكەلەي سول جەرلەرگە جاققان الدەقايدا پايدالى.
سونداي-اق ەفير مايلارىن تەرىگە جاققان كەزدە اللەرگيالىق رەاكسيالار بولۋى ىقتيمال ەكەنىن ۇمىتپاڭىز. ونىڭ بەلگىلەرى – تەرىدەگى كوپىرشىكتەر، بورتپەلەر، جارىقتار مەن قابىرشاقتار، تەرىنىڭ ماي جاققان بولىگىندە قىزۋ مەن شانشۋدىڭ سەزىلۋى.
دەمەك، ەفير مايلارىن كىندىككە جاعۋ ماعىناسىز. مۇنداي ەم ءتۇرىنىڭ قانداي دا ءبىر اۋرۋدان جازاتىنىنا ەشقانداي دالەل جوق. كىندىك – بۇل ادام اعزاسىنىڭ مۇشەلەر جۇيەسىمەن بايلانىستى ەمەس جانە كورۋ قابىلەتىنە، بۋىن دەنساۋلىعىنا، فەرتيلدىلىككە جانە باسقا كورسەتكىشتەرگە اسەر ەتپەيتىن تىرتىق.