كيىك اۋلاۋعا قاتىستى كەي مالىمەتتەر قاۋىپسىزدىك ماقساتىندا قۇپيا بولادى

ورتالىق كوممۋنيكاسيالار قىزمەتىنىڭ بريفينگىندە ەكولوگيا جانە تابيعي رەسۋرستار ءمينيسترى ەرلان نىسانبايەۆ ءجۋرناليستىڭ سۇراعىنا جاۋاپ بەردى. 

ول كيىكتەردى اتۋ ورنى نەلىكتەن قۇپيا ەكەنىن ءتۇسىندىردى، دەپ حابارلايدى Almaty-akshamy.kz.

"مۇندا، بىرىنشىدەن، قاۋىپسىزدىك ماسەلەسى بار. ەكىنشىدەن، ەگىستىك، شابىندىق ورىندارىن ساقتاۋ كەرەك. حالىقتى دۇرلىكتىرىپ وتىرعان كەي ازاماتتار بار. كيىكتىڭ سانى ازايسا، مەنىڭ دە قابىرعام قايىسادى. ءبىراق بۇگىندە كيىك سانى كوبەيدى، سوندىقتان مۇنى رەتتەۋ كەرەك"، – دەدى ول.

ءمينيستردىڭ سوزىنشە، كەلەسى جىلى كيىكتەر سانى 2،6 ميلليون باسقا جەتەدى. ال ونىڭ 1،6 ميلليونى بقو اۋماعىن مەكەندەيدى ەكەن.

"بۇل ايماقتاعى جايىلىم كولەمى وسىنشا كيىكتى قامتاماسىز ەتە المايدى. سالدارى جۇتقا اكەپ سوعۋى مۇمكىن. ونىڭ ۇستىنە عالىمداردىڭ سوزىنشە، ورال كيىكتەرى بەتپاقدالا كيىكتەرىنە قاراعاندا ۇساقتاۋ. سەبەبى بەتپاقدالا جايىلىم كەڭ، ءشوپ جەتكىلىكتى. ءتىپتى كيىكتەردىڭ اراسىندا شوپكە تالاس كۇشەيگەن. سىزدەردەن تىعىلىپ اتىپ وتىرعانىمىز جوق"، – دەپ قوستى مينيستر.

ەرلان نىسانبايەۆ كيىك اتۋ ورنىنىڭ قۇپيا بولۋى كولەڭكەلى بيزنەستىڭ وركەندەۋىنە اكەپ سوقپايتىنىن مالىمدەدى.

"كيىك اتۋ ماسەلەسى تىڭ باقىلاۋدا، شتابتار قۇرىلعان. ولاردىڭ قۇرامىندا ءتۇرلى مەملەكەتتىك ورگان وكىلدەرى بار. سونداي-اق ورمان مەن اڭ شارۋاشىلىعى كوميتەتى، ىشكى ىستەر مينيسترلىگىنىڭ ايماقتارداعى وكىلدەرى كيىكتى جاسىرىن اتۋ فاكتىلەرىن بولدىرماۋ ءۇشىن ارەكەت ەتەدى"، – دەيدى ەرلان نىسانبايەۆ.

ەسكە سالايىق، بۇعان دەيىن ەكولوگيا جانە تابيعي رەسۋرستار ءمينيسترى ەرلان نىسانبايەۆ الاپات ءورت شىققان “سەمەي ورمانى” رەزەرۆاتى جۇمىسشىلارىنىڭ جالاقىسى قانشاعا وسكەنىن ايتقان ەدى.