جىل باسىنان بەرى Kids go free باعدارلاماسى ارقىلى 600-دەن استام بالا تەگىن ۇشاق بيلەتىمەن قامتىلدى.
ەل ىشىندەگى ساياحاتتى تاڭداعان 300-دەن استام قازاقستاندىق وتباسى 26 ملن تەڭگەگە دەيىن ۇنەمدەدى، دەپ حابارلايدى Almaty-akshamy.kz.
Kids go free – مادەنيەت جانە سپورت مينيسترلىگى ازىرلەگەن وتباسىلىق تۋريزمگە ارنالعان باعدارلاما.
Inform.kzء-تىڭ اقپاراتىنا سۇيەنسەك، قازاقستاندىقتار تۋريستىك وپەراتوردان ەل ىشىندەگى باعىتتار بويىنشا تۋريستىك پاكەت ساتىپ العاندا 2 جاستان 17 جاسقا دەيىنگى بالالارعا تەگىن اۆيابيلەت الا الادى. باعدارلاما اياسىندا ورتا ەسەپپەن ءبىر تۋردا ەكى بالا ساياحاتتايدى.
ماسەلەن، ماۋسىم ايىندا ەڭ ءتيىمدى ساياحات استانا – شىمكەنت – استانا باعىتى بويىنشا تىركەلگەن. بىردەن 3 نەمەسە ودان دا كوپ بالاسى بار 3 وتباسى جوسپارلانعان بيۋدجەتتىڭ 40 پايىزىنان استامىن ۇنەمدەگەن.
«باعدارلاما بويىنشا ساياحاتتاۋ وڭاي ءارى قولجەتىمدى. ول ءۇشىن kids.gofree.kz سايتىنا كىرۋ كەرەك. كەڭەس الىڭىز جانە وتباسىڭىزعا سايكەس كەلەتىن تۋر پاكەتىن تاڭداڭىز. قاجەتتى قۇجاتتاردى ۇسىنىپ، تۋر پاكەتىن ساتىپ الۋ ءۇشىن كەلىسىمشارت جاساڭىز جانە بالالارىڭىز ءۇشىن تەگىن اۋە بيلەتىن الىڭىز»، - دەيدى مسم تۋريزم يندۋسترياسى كوميتەتىنىڭ ءتوراعاسى داستان رىسپەكوۆ.