كيبەربۋللينگ – بۇل ينتەرنەت نەمەسە باسقا دا الەۋمەتتىك جەلى، ۇيالى تەلەفون ارقىلى بىرەۋدى قورقىتۋ، كەمسىتۋ، قورلاۋ.
قازاقستان مۇسىلماندارى ءدىني باسقارماسى كيبەربۋليينگتىڭ شاريعي ۇكىمى قانداي ەكەنىن ايتتى، دەپ حابارلايدى aqshamnews.kz.
قمدب كەلتىرگەن دەرەك بويىنشا: شاريعاتتا بىرەۋدى قورقىتۋعا، قورلاۋعا، مازاق ەتۋگە، ايىبىن اشۋعا، كەمسىتۋگە تىيىم سالىنعان.
«ۋا، يمان كەلتىرگەندەر! ەشبىر قاۋىم ەكىنشى ءبىر باسقا قاۋىمدى مازاق ەتپەسىن! بالكىم، سولار (مازاق ەتكەندەرى) وزدەرىنەن قايىرلى بولار. ايەلدەر دە باسقا ايەلدەردى (مازاق ەتپەسىن) بالكىم، سولار (مازاق ەتكەندەرى) وزدەرىنەن قايىرلى بولار. سونداي-اق وز-وزدەرىڭدى داتتاماڭدار ءارى بىر-بىرىڭە جامان لاقاپ تاقپاڭدار ...»، - دەلىنگەن قۇراندا.
پايعامبارىمىز (وعان اللانىڭ سالاۋاتى مەن سالەمى بولسىن) بىلاي دەيدى:
«مۇسىلمان ءۇشىن مۇسىلمان باۋىرىن وزىنەن تومەن ساناۋدان (كەمسىتۋ، قورلاۋ) اسقان جاماندىق جوق. مۇسىلماننىڭ قانى، دۇنيە-مۇلكى جانە ار-نامىسى وزگە مۇسىلماندارعا – حارام». تاعى ءبىر حاديستە: «مۇسىلماننىڭ مۇسىلماندى قورقىتۋى – حالال ەمەس»، – دەگەن.
ءاس-سافارايني بىلاي دەيدى: «كىمدە-كىم جولداستارى مەن دوستارىنىڭ ءبىرىن جەك كورسە نەمەسە مازاق ەتسە نە ءمۇميننىڭ ءبىرىن قورلاسا، كەمسىتسە اشىق كۇنا جاساپتى».
سوندىقتان كيبەربۋللينگكە جانە بۋللينگتىڭ كەز كەلگەن تۇرىنە (ءسوز فورماسىنداعى بۋللينگ، كۇش كورسەتۋ ارقىلى قورقىتۋ، رەلياسيون تىيىم سالىنادى.
- كيبەربۋللينگكە جانە بۋللينگتىڭ كەز كەلگەن تۇرىنە شاريعات تۇرعىسىنان قاتاڭ تىيىم سالىنادى.
- الەۋمەتتىك جەلى، ۇيالى تەلەفون ارقىلى جالعان اقپارات تاراتۋ، ونى ءبولىسۋ، سونداي-اق بىرەۋدى بالاعاتتاپ، قورلاپ جازبا قالدىرۋ جانە وعان ورتاقتاسىپ «لايك» باسۋ – كۇنا ءىس.
- بىرەۋدىڭ جەكە جازبالارىن، سۋرەتتەرىن، بەينەجازبالارىن شىعارامىن دەپ قورقىتۋ، بىرەۋدىڭ ءدىنىن نە مادەنيەتىن كەمسىتۋ جانە ت.ب. كيبەربۋللينگتىڭ تۇرلەرىنە تىيىم سالىنادى.