دەنساۋلىق ساقتاۋ ءمينيسترى جاڭا ەرەجەنى ءتۇسىندىردى.
ءمينيستردىڭ ايتۋىنشا، جاڭا ەرەجەلەر بويىنشا قوعامدىق تالقىلاۋ جاقىندا عانا اياقتالعان، قۇجات ءالى بەكىتىلمەگەن، دەپ حابارلايدى aqshamnews.kz
جاڭا ەرەجەگە سايكەس، 4-ساناتتاعى ناۋقاستار جۇمىس كۇندەرى جانە سەنبى كۇندەرى ساعات 08:00-دەن 20:00-گە دەيىن عانا جەدەل جاردەم شاقىرا الادى.
قالعان ۋاقىتتا ولار مەديسينالىق مەكەمەلەردىڭ جەدەل جاردەم بولىمىنە ءوز بەتىنشە بارۋى قاجەت.
"باستاپقىدا بۇيرىق جوباسىندا جەدەل مەديسينالىق جاردەم قىزمەتى 1، 2 جانە 3 ساناتتاعى ناۋقاستارعا تاۋلىك بويى قىزمەت كورسەتەتىنى جانە جۇمىس ىستەيتىنى ايتىلعان. ال 4-ساناتتاعى ناۋقاستارعا العاشقى مەديسينالىق-سانيتارلىق كومەك كورسەتىلەدى. مەديسينالىق كومەك كورسەتۋدىڭ قولجەتىمدىلىگى مەن جىلدامدىعىن قامتاماسىز ەتۋ ماقساتىندا 4-ساناتتاعى ناۋقاستاردى تۇنگى ۋاقىتتا جەدەل مەديسينالىق جاردەم ستانسياسىنا كوشىرۋ، ال پوليكلينيكالاردا جۇمىس ۋاقىتىن ساعات 08:00-دەن 20:00-گە دەيىن قالدىرۋ ۇسىنىلادى"،-دەدى ءالنازاروۆا.