الماتى قالاسى اۋماقتىق سايلاۋ كوميسسياسىنىڭ ءتورايىمى جاننا اسانوۆا الماتىداعى قازاقستان رەسپۋبليكاسى پرەزيدەنتىنىڭ سايلاۋىن جاريالاۋعا ارنالعان باسپا ءسوز ورتالىعىنىڭ الاڭىندا سايلاۋ بارىسى تۋرالى ماڭىزدى اقپارات بەردى.
جابىق سايلاۋ ۋچاسكەلەرىندە 12 381 سايلاۋشى داۋىس بەردى. الدىن الا ءوتىنىش جازعان 2295 ازامات ۇيىندە داۋىس بەرۋگە ءوتىنىش بىلدىرگەن. الماتىداعى سايلاۋ ۋچاسكەلەرىندە 3 مىڭنان استام ۇلتتىق جانە 43 حالىقارالىق باقىلاۋشى جۇمىس ىستەپ جاتىر، دەپ حابارلايدى Almaty-akshamy.kz.
جاننا اسانوۆا سايلاۋ كوميسسياسىنىڭ زاڭعا سايكەس حاتتامانى كىمگە بەرۋگە قۇقىعى بار ەكەنىن تاعى دا ءتۇسىندىردى.
«زاڭدا داۋىستاردى ساناۋعا قاتىسقان بايقاۋشىنىڭ، سەنىمدى تۇلعالاردىڭ داۋىس بەرۋ ناتيجەلەرى تۋرالى حاتتامانى ۇسىنۋ ءتارتىبى بەلگىلەنگەن، حاتتاما سايلاۋ كوميسسياسىنىڭ ستەندىلەرىنە دە ىلىنەدى. حاتتامانى ب ا ق وكىلدەرىنە بەرۋ زاڭدا قاراستىرىلماعان»، - دەيدى ج.اسانوۆا.
سونداي-اق، باسپا ءسوز ءماسليحاتى بارىسىندا جاننا اسانوۆا سايلاۋشىلاردىڭ سايلاۋ بيۋللەتەنىن جاشىككە سالار الدىندا سۋرەتكە ءتۇسىرىپ الۋى كەڭ تاراعان جاعدايعا قاتىستى پىكىر ءبىلدىردى. مۇنداي جاعداي بۇگىن №55 ورتا مەكتەپتەگى №72 سايلاۋ ۋچاسكەسىندە ورىن الدى.
«بۇل ارەكەت پەن ۇگىت جۇرگىزۋدىڭ ارا-جىگىن اجىراتىپ الۋ كەرەك، ەگەر سايلاۋشى بيۋللەتەندى جاشىككە سالماي تۇرىپ سۋرەتكە ءتۇسىرىپ السا جانە ونى ەشقايدا جاريالاماسا، بۇل زاڭ بۇزۋشىلىق ەمەس. ەستەلىك ءۇشىن سۋرەتكە تۇسىرۋگە بولادى، ءبىراق ەگەر ادام بەلگىلى ءبىر كانديداتتى تاڭداعانىن كورسەتىپ، ونى قولداپ بيۋللەتەندى جاريالاسا، بۇل باسقا ماسەلە. سوندىقتان بۇل جەردە ۇلكەن ايىرماشىلىق بار»، - دەپ ءتۇسىندىردى ج.اسانوۆا.