98 ناۋقاس اۋرۋحاناعا جاتقىزىلدى
تۇركىستان وبلىسىنداعى ءدامحانالاردىڭ بىرىندە سوڭعى ەكى ايدا 167 ادام استان ۋلانعان. مەكەمە باسشىلىعىنا قاتىستى ءىس قوزعالدى، دەپ حابارلايدى Almaty-akshamy.kz.
اتالعان فاست-فۋد ورتالىعى ءقازىر جابىق تۇر. جۇرت جاپپاي اۋرۋحاناعا تۇسكەن سوڭ، پوليسيا باسقارماسى مەن سەس ماماندارى ءدامحانانى جوسپاردان تىس تەكسەرگەندە نىساننىڭ سانيتارلىق قۇجاتى تۇگىلى، اسپازدارىنىڭ مەديسينالىق كىتاپشاسى بولماي شىقتى. ءبىر قىزىعى، تامىز ايىندا عانا ءدال وسى ءدامحانادان تاماق ىشكەن سەگىز ادام ۋلانىپ اۋرۋحاناعا تۇسكەن ەكەن. ءبىراق ول كەزدە بۇل ءجايت ەشكىمدى سەلت ەتكىزبەگەن. ەندى پوليسەيلەر قىلمىستىق ءىس قوزعاپ، تەرگەۋ جۇرگىزىپ جاتىر. ال استان ۇشىنعان 167 ادام قازان ايىنىڭ 6-9 ارالىعىندا تاماقتانىپتى، دەلىنگەن كتك تەلەارناسىنىڭ سيۋجەتىندە.
"جالپى 145 ناۋقاس كەلىپ تىركەلدى. ونىڭ 98ء-ى اۋرۋحاناعا جاتقىزىلدى. 47 ناۋقاس امبۋلاتورلىق ەمگە جىبەرىلدى. تۇركىستان قالاسىنا 31 ناۋقاس جاتقىزىلدى. كەنتاۋ قالاسىنا – 67 ناۋقاس. ونىڭ ىشىندە بەس جۇكتى ايەل مەن 33 بالا بار. ءبارىنىڭ جاعدايى ورتاشا اۋىرلىقتا. بۇگىن جاعدايى جاقسارعان ناۋقاستار ۇيىنە شىعارىلادى"، - دەدى تۇركىستان وبلىسى قوعامدىق دەنساۋلىق باسقارماسى باسشىسىنىڭ ورىنباسارى التىن دوسانوۆا.