كەڭەس وداعىنان قالعان اۋىل اتاۋلارى قازاقشالانىپ جاتىر

لەنين جولى، كوممۋنيزم سياقتى اتاۋلار وزگەرتىلىپ جاتىر.

تۇركىستان وبلىسىنىڭ كەلەس اۋدانىنداعى سەگىز ەلدى مەكەننىڭ اتاۋى اۋىستى، دەپ حابارلادى Almaty-akshamy.kz Turkystan.kz سىلتەمە جاساپ. 

تۇركىستان وبلىسى اكىمدىگىنىڭ قاۋلىسى مەن ءماسليحاتتىڭ بىرلەسكەن شەشىمىنە سايكەس، كەلەس اۋدانى اقتوبە اۋىلدىق وكرۋگىنىڭ م.گوركيي اۋىلى بۇدان بىلاي كەڭدالا اتالادى. ال اقتوبە اۋىلدىق وكرۋگىنىڭ ورتالىعى – قىزىلاسكەر اۋىلى لەسبەك باتىر اتاۋىنا يە بولدى. سونداي-اق اۋدانداعى وردجينيكيدزە اۋىلى سامبەت ساتتاروۆ، دميتروۆو اۋىلى وراز اتا، ازەربايجان ەلدى مەكەنى كولتوعان، لەنين جولى اۋىلى اقجول، پەرۆوە مايا اۋىلى 1 مامىر، كوممۋنيزم ەلدى مەكەنى اششىساي بولىپ وزگەرتىلدى.

«تاۋەلسىزدىكتىڭ ارقاسىندا ءوڭىرىمىز اۋماعىنداعى وتارشىلدىق پەن توتاليتارلىق داۋىرلەردەن قالعان اتاۋلاردان بىرتىندەپ ارىلىپ كەلەمىز. بۇل جۇمىستاردىڭ ارتىندا زيالى قاۋىم مەن ءتۇرلى قوعامدىق بىرلەستىكتەردىڭ جانە جەرگىلىكتى ونوماستيكا كوميسسيالارى تاراپىنان ۇزاق جىلدار بويى تىنىمسىز جۇرگىزىلگەن جۇيەلى جۇمىس ناتيجەسىندە قول جەتكىزدىك»، – دەيدى اۋداندىق ونوماستيكا سالاسىنا جاۋاپتى ىشكى ساياسات، مادەنيەت، تىلدەردى دامىتۋ جانە سپورت ءبولىمى باسشىسىنىڭ ورىنباسارى ەربول نازاروۆ.