كەن ورىندارى قاتاڭ تەكسەرىلۋدە

جەر قويناۋىن پايدالانۋ قۇقىعى بەرىلەدى.

مينەرالدىق-شيكىزات بازاسىن تولىقتىرۋ، گەولوگيالىق زەردەلەۋدى ارتتىرۋ، جۇمىس ىستەپ تۇرعان ءوندىرىس ورىندارىن شيكىزاتپەن قامتاماسىز ەتۋ جانە جاڭا ءوندىرىس ورىندارىن قۇرۋ ماقساتىندا يندۋستريا جانە ينفراقۇرىلىمدىق دامۋ مينيسترلىگىمەن جەر قويناۋىن پايدالانۋ قۇقىعى بەرىلەدى، دەپ حابارلايدى Almaty-akshamy.kz Egemen.kz-كە سىلتەمە جاساپ.

وسى جايىندا ۇكىمەت وتىرىسىندا بايانداما جاساعان يندۋستريا جانە ينفراقۇرىلىمدىق دامۋ ءمينيسترى قايىربەك وسكەنبايەۆ مالىمدەدى.

2021 جىلدىڭ قورىتىندىسى بويىنشا، بۇل ماقساتتا 1700-دەن استام ليسەنزيا بەرىلىپ، 800-گە جۋىق وتاندىق يۋنيورلىق كومپانيا قۇرىلعان. بۇگىندە جۇمىس ىستەپ تۇرعان ءوندىرىس ورىندارىن شيكىزاتپەن قامتاماسىز ەتۋ ءۇشىن وتاندىق بيزنەس وكىلدەرى كەن ورىندارىن بارلاۋ بويىنشا مىندەتتەمەلەر الىپ وتىر. 

«مەملەكەت باسشىسىنىڭ تاپسىرماسىنا سايكەس، ءقازىر بارلىق كەن ورىندارىن تەكسەرىپ جاتىرمىز. بۇگىندە قاتتى پايدالى قازبالار بويىنشا جەر قويناۋىن پايدالانۋ سالاسىندا 499 كەلىسىمشارت جانە 1738 ليسەنزيا ىسكە اسىرىلۋدا. جەر قويناۋىن پايدالانۋعا بۇرىن-سوڭدى بەرىلگەن قولدانىستاعى بارلىق كەلىسىمشارت پەن ليسەنزيالارعا تالداۋ جاسالدى. بۇل 2 مىڭنان استام قۇجات. وسىلايشا، 118 ليسەنزيانىڭ قولدانىلۋى توقتاتىلدى. تالداۋ قورىتىندىسى نەگىزىندە قولدانىستاعى 1620 ليسەنزيا بويىنشا ءتيىستى شارالار قابىلداناتىن بولادى»، - دەپ اتاپ ءوتتى قايىربەك وسكەنبايەۆ.

ەندىگى كەزەكتە مىندەتتەمەلەردى ورىنداۋ كورسەتكىشتەرى 100 پايىزدان تومەن سانالاتىن جەر قويناۋىن پايدالانۋشىلار تەكسەرىلەتىن بولادى.

ءمينيستردىڭ اقپاراتىنا سايكەس، جاڭا شارتتار بويىنشا ءاربىر جەر قويناۋىن پايدالانۋشى وڭىرلىك الەۋمەتتىك جوبالارعا قاتىسىپ، جاڭا ءوندىرىس ورىندارىن قۇرادى. سونىمەن بىرگە، جۇمىس ىستەپ تۇرعان وندىرىستەردى جاڭعىرتىپ، قوسىمشا جۇمىس ورىندارىن اشادى جانە وتاندىق وندىرىستىك كاسىپورىنداردى شيكىزاتپەن قامتاماسىز ەتەدى.