كەلەسى جىلى ۇبت ساۋىردە ءوتۋى مۇمكىن

وزگەرىستەر تەستىلەۋ ورتالىعى تاراپىنان جوبا رەتىندە ۇسىنىلعان.

ەندى مامىر ايىندا تەستىلەۋ وتكىزىلمەۋى مۇمكىن، دەپ حابارلايدى Almaty-akshamy.kz 

2023 جىلى نەگىزگى ۇبت ءساۋىر جانە شىلدە ايلارىندا وتەدى دەپ جوسپارلانىپ وتىر. بۇل تۋرالى ۇلتتىق تەستىلەۋ ورتالىعىنىڭ ديرەكتورى رۋسلان ەمەلبايەۆ  ايتتى.

ونىڭ ايتۋىنشا، جىل سايىن نەگىزگى ۇبت مامىر جانە ماۋسىم ايلارىندا وتكىزىلىپ كەلدى، ەندى وعان وزگەرىس ەنگىزۋ ءۇشىن ارنايى جوبا ازىرلەنگەن.

«بيىلعى جوسپار بويىنشا ءبىرىنشى مۇمكىندىككە تىركەلۋ ناۋرىز ايىندا اشىلادى. العاشقى تەستىلەۋدى ءساۋىر ايىندا وتكىزۋدىڭ بىرنەشە سەبەبى بار: بىرىنشىدەن، مامىر ايىندا مەرەكە كوپ. ەكىنشىدەن، بيىلعى وقۋ جىلىندا سوڭعى قوڭىراۋ 31 مامىردا وتەدى. وقۋشىلاردىڭ بار ويى سوڭعى قوڭىراۋدى وتكىزۋدە بولادى»، – دەدى رۋسلان توحتار ۇلى.

ۇلتتىق تەستىلەۋ ورتالىعى عىلىم جانە جوعارى ءبىلىم مينيسترلىگىنە ۇسىنعان جاڭا جوبادا جاۋاپ نۇسقالارىنىڭ سانى وزگەرتىلگەن. ياعني ءبىر دۇرىس جاۋابى بار تەست تاپسىرمالارىندا نۇسقالار سانى 5-تەن 4-كە دەيىن، ءبىر نەمەسە بىرنەشە دۇرىس جاۋابى بار تەست تاپسىرمالارىندا (ءۇش دۇرىس جاۋاپتان كوپ ەمەس) نۇسقالار سانى 8-دەن 6-عا دەيىن ازايادى.

سونداي-اق ۇتو ديرەكتورى رۋسلان ەمەلبايەۆتىڭ ايتۋىنشا، سۇراقتار سانى دا وزگەرەدى. «وقۋ ساۋاتتىلىعى» بويىنشا 15 سۇراق: 5 سۇراقتان 3 ءماتىن (200-350 ءسوز) بەرىلەدى، ال «قازاقستان تاريحى» بويىنشا 20 سۇراق: ءبىر دۇرىس جاۋاپتى 10 تاپسىرما، ءمانماتىن نەگىزىندە 10 تاپسىرما بەرىلەدى.