كەلەسى جىلى 90 ملن توننادان استام مۇناي وندىرەمىز – مينيستر

71-72،5 ملن تونناعا دەيىن ەكسپورتتاۋعا بولادى. 

ق ر ەنەرگەتيكا ءمينيسترى بولات اقشولاقوۆ ۇكىمەت كۋلۋارىندا كەلەسى جىلى مۇناي ءوندىرىسىنىڭ كولەمى قانشا بولاتىنى تۋرالى پايىمىن ايتتى، دەپ حابارلايدى Almaty-akshamy.kz قازاقپاراتقا سىلتەمە جاساپ.

«وزدەرىڭىز بىلەسىزدەر، بيىل، وكىنىشكە قاراي، ءبىراز اپاتتىق جاعدايلار بولدى. سول سەبەپتى مۇناي ءوندىرىسىنىڭ كولەمىن 84 ميلليون تونناعا دەيىن جەتكىزسەك تە، شۇكىر ەتەمىز. كەلەسى جىلى 90 ميلليوننان اسىرايىن دەپ وتىرمىز. سوندا 71-72،5 ملن تونناعا دەيىن ەكسپورتتاۋعا بولادى. مىسالى، بيىل 68 ملن توننا مۇناي ەكسپورتتاۋدى جوسپارلاعانبىز. سونىڭ وزىندە اپاتتاردىڭ، قاشاعاندا، تەڭىزدە بولعان جاعدايلاردىڭ كەسىرىنەن 66-65،5 ملن تونناعا دەيىن ءتۇستى. سونىڭ ءبارىن ەسەپكە العاندا 84 ملن توننا عانا بولدى»، - دەدى ول.

ءمينيستردىڭ سوزىنە قاراعاندا 2023 جىلى مۇناي ەكسپورتىنىڭ دا كولەمى ارتۋى كەرەك.

«ال كەلەسى جىلى ءوندىرىس ورىندارى تولىق قۋاتىندا جۇمىس ىستەيدى. ياعني، 90 ملن توننادان استام مۇناي وندىرۋگە بولادى جانە ەكسپورتتىڭ دا كولەمى وسەدى»، - دەدى بولات اقشولاقوۆ.