بۇعان دەيىن ءماسليحات اپپاراتتارى مەملەكەتتىك قىزمەتشىلەرىنىڭ جالاقىسى وسكەن
ەلىمىزدە 2022 جىلدىڭ 1 قاڭتارىنان ءماسليحات حاتشىلارىنىڭ جالاقىلارى وسەدى. بۇل جايىندا سەنات دەپۋتاتتارىنىڭ ساۋالىنا ق ر پرەمەر-مينيسترى اسقار ءماميننىڭ بەرگەن جاۋابىندا ايتىلعان، دەپ حابارلايدى Almaty-akshamy.kz قازاقپاراتقا سىلتەمە جاساپ.
«سىزدەردىڭ بارلىق دەڭگەيدەگى ءماسليحات حاتشىلارىنىڭ، تەكسەرۋ كوميسسيالارىنىڭ ءتوراعالارى مەن مۇشەلەرىنىڭ لاۋازىمدىق ايلىقاقىلارىن كوتەرۋ تۋرالى دەپۋتاتتىق ساۋالدارىڭىزدى قاراپ، مىنانى حابارلايمىن. جوعارىدا كورسەتىلگەن لاۋازىمدارعا ەڭبەكاقى تولەۋ «مەملەكەتتىك بيۋدجەت ەسەبىنەن ۇستالاتىن بارلىق ورگانداردىڭ قىزمەتكەرلەرىنە ەڭبەكاقى تولەۋدىڭ ءبىرىڭعاي جۇيەسىن بەكىتۋ تۋرالى» ۇكىمەتتىڭ 2017 جىلعى 16 قازانداعى № 646قبپ قاۋلىسىمەن رەتتەلەدى. مەملەكەت باسشىسىنىڭ مەملەكەتتىك ورگانداردا ەڭبەكاقى تولەۋدىڭ جاڭا جۇيەسىن ەنگىزۋ جونىندەگى تاپسىرماسىن ىسكە اسىرۋ اياسىندا (2020 جىلعى 1 قىركۇيەكتەگى «جاڭا جاعدايداعى قازاقستان: ءىس-قيمىل كەزەڭى» اتتى جولداۋىن ىسكە اسىرۋ جونىندەگى جۇج-نىڭ 8-تارماعى) 2021 جىلعى 30 ماۋسىمدا جوعارىدا اتالعان قاۋلىعا ءتيىستى وزگەرىستەر ەنگىزىلدى (ق ر ۇكىمەتىنىڭ № 451قبپ قاۋلىسى). ەنگىزىلگەن وزگەرىستەرگە سايكەس جەرگىلىكتى اتقارۋشى ورگانداردىڭ مەملەكەتتىك قىزمەتشىلەرىنىڭ، بارلىق دەڭگەيدەگى ءماسليحات اپپاراتتارىنىڭ مەملەكەتتىك قىزمەتشىلەرىنىڭ، تەكسەرۋ كوميسسيالارىنىڭ مەملەكەتتىك قىزمەتشىلەرىنىڭ، ونىڭ ىشىندە ولاردىڭ ءتوراعالارى مەن مۇشەلەرىنىڭ لاۋازىمدىق ايلىقاقىلارى 2021 جىلعى 1 شىلدەدەن باستاپ جوعارىلادى»، - دەلىنگەن ۇكىمەت باسشىسىنىڭ جاۋابىندا.
سونىمەن قاتار اسقار ءماميننىڭ جاۋابىندا اتالعان قاۋلىعا سايكەس جالاقى مولشەرى لاۋازىمدىق ايلىقاقى سحەماسىنا جانە لاۋازىمداردى دەڭگەيلەر مەن فۋنكسيونالدىق بلوكتار بويىنشا بولۋگە سايكەس بەلگىلەنەتىندىگى ايتىلادى. بۇل رەتتە، لاۋازىمدار فۋنكسيونالدىق بلوكتارعا بولىنەدى، ال فۋنكسيونالدىق بلوكتار مىندەتتەردى ىسكە اسىرۋ قاعيداتتارىنا، جاۋاپكەرشىلىك دەڭگەيىنە جانە تالاپ ەتىلەتىن بىلىكتىلىككە سۇيەنە وتىرىپ، لاۋازىمعا تيەسىلىكتى كورسەتەدى.
«بارلىق دەڭگەيدەگى ءماسليحات حاتشىلارىنىڭ لاۋازىمدىق ايلىقاقىلارىن كوتەرۋگە قاتىستى مەملەكەت باسشىسى 2021 جىلعى 8 قازانداعى № 64-18.0 پاب-9 قارارمەن 2022 جىلعى 1 قاڭتاردان باستاپ ءماسليحات حاتشىلارىنىڭ جالاقىلارىن ارتتىرۋ تۋرالى ۇكىمەتتىڭ ۇسىنىسىن قولداعانىن حابارلايمىن. وسىعان بايلانىستى، اعىمداعى جىلدىڭ سوڭىنا دەيىن ۇكىمەت مەملەكەتتىك بيۋدجەت ەسەبىنەن ۇستالاتىن بارلىق قىزمەتكەرلەردىڭ ەڭبەگىنە اقى تولەۋدى رەگلامەنتتەيتىن جوعارىدا اتالعان قاۋلىعا ءتيىستى تۇزەتۋلەر ەنگىزۋ بويىنشا قاجەتتى شارالار قابىلدايتىن بولادى»، - دەيدى پرەمەر-مينيستر جاۋابىندا.