13 جوبا بويىنشا جوبالاۋ-سمەتالىق قۇجاتتامالاردى اياقتاۋعا 340 ملن تەڭگە قاراستىرىلعان.
2023 جىلى الماتىدا 8 پارك ايماعىن قۇرۋ جانە رەكونسترۋكسيالاۋ جوسپارلانۋدا. كوكالداندىرۋ شارالارىنا 2023 جىلعى بيۋدجەت جوباسىندا 6،8 ملرد تەڭگە كوزدەلگەن. بۇل تۋرالى شاھار جەتەكشىسى ەربولات دوسايەۆ الماتىنىڭ قالاسىنىڭ 2023-2025 جىلدارعا ارنالعان بيۋدجەت جوباسىن قاراۋ بارىسىندا ايتتى، دەپ حابارلايدى Almaty-akshamy.kz.
ەربولات دوسايەۆتىڭ ايتۋىنشا،كەلەسى جىلى 13 جوبا بويىنشا جوبالاۋ-سمەتالىق قۇجاتتامالاردى اياقتاۋعا 340 ملن تەڭگە قاراستىرىلعان، ونىڭ ىشىندە – باۋم توعايى، تۇڭعىش پرەزيدەنت پاركى، سايران كولى، ۇلكەن الماتى جانە كىشى الماتى وزەندەرى، د.ا. قونايەۆ اتىنداعى ۇلكەن الماتى كانالى، الاتاۋ اۋدانىنداعى جاڭا «سوسنوۆىي بور» پاركى ، سونداي-اق اتاكەنت اۋماعىن قايتا جاڭارتۋ جوبالارى بار.
«بيىل جۇرگىزىلگەن زەرتتەۋلەردىڭ قورىتىندىسى بويىنشا، سۋ باساتىن 102 ۋچاسكە انىقتالدى، ونىڭ ىشىندە وسى جىلى 56 ۋچاسكەدە سۋ تاسقىنىن جويۋ جۇمىستارى اياقتالادى. 2023 جىلى قالعان 46 ۋچاسكەدە سۋ باسۋ ءقاۋپىن جويۋ ءۇشىن، سونداي-اق 305،4 كم ارىق جەلىسى مەن نوسەر كاناليزاسياسىن رەكونسترۋكسيالاپ، ءارى قاراي سالۋ ءۇشىن 2023 جىلعى بيۋدجەت جوباسىندا 4 ملرد تەڭگە كوزدەلگەن»، - دەدى قالا باسشىسى.
اكىمنىڭ ايتۋىنشا، اۋانىڭ لاستانۋ كوزدەرىن انىقتاۋ، اۆتوماتتى مونيتورينگ جۇيەسىن ەنگىزۋ ەكولوگيالىق مونيتورينگ جۇيەسىنە قوسىمشا 500 داچيكتى قوسىپ، قالانىڭ لاستانۋ دارەجەسىن ءدال باقىلاۋعا مۇمكىندىك بەرەدى. 2023 جىلعى بيۋدجەتتە 1 ملرد تەڭگە جوسپارلانعان.