بۇگىندە ەل تىنىشتىعى مەن قوعامدىق قاۋىپسىزدىگىن قامتاماسىز ەتۋگە باعىتتالعان اسكەري ماماندىقتارعا جاستاردىڭ قىزىعۋشىلىعى ارتىپ كەلەدى.
اسىرەسە، قازاقستان رەسپۋبليكاسى ۇلتتىق ۇلانىنىڭ بەدەلدى وقۋ ورنى – ۇلتتىق ۇلان اكادەمياسى بولاشاق وفيسەر بولۋدى ماقسات ەتكەن جاستار ءۇشىن ۇلكەن ومىرگە باستار ماڭىزدى قادام سانالادى. ەلدىڭ تۇكپىر-تۇكپىرىنەن كەلگەن تالاپكەرلەر وسى وقۋ ورداسىن تاڭداپ، اسكەري قىزمەتتىڭ جاۋاپتى ءارى ابىرويلى جولىن تاڭدادى، - دەپ حابارلايدى Aqshamnews.kz.
سولاردىڭ ءبىرى – الماتى قالاسى بوستاندىق اۋدانىنىڭ تۋماسى ابديماناتوۆ نارتاي يساتاي ۇلى. ونىڭ اسكەري قىزمەتكە دەگەن قىزىعۋشىلىعى بالا كەزىنەن باستاۋ الادى. سپورتتى سەرىك ەتكەن جاس كۋرسانت ۆولەيبولمەن اينالىسىپ، توزىمدىلىك پەن تارتىپكە، ەڭبەكقورلىق پەن تاباندىلىققا ەرتە ۇيرەندى. ءدال وسى قاسيەتتەر كەيىن ونىڭ ەلگە قىزمەت ەتەمىن دەگەن ومىرلىك شەشىم قابىلداۋىنا نەگىز بولدى.
مەكتەپ قابىرعاسىندا جۇرگەن كەزىنەن-اق نارتايدىڭ ارمانى ايقىندالا ءتۇستى. 11-سىنىپتا وقىپ جۇرگەن كەزىندە وقۋ ورنىنا كەلگەن اسكەري قىزمەتشىلەر قازاقستان رەسپۋبليكاسى ۇلتتىق ۇلان اكادەمياسى، كۋرسانتتاردىڭ كۇندەلىكتى ءومىرى مەن اسكەري قىزمەتتىڭ ماڭىزى تۋرالى كەڭىنەن اڭگىمەلەپ بەرگەن. اسكەريلەردىڭ سالماقتى ءسوزى، تارتىپكە نەگىزدەلگەن ءومىرى مەن وفيسەرلىك ابىروي جاس تالاپكەرگە ەرەكشە اسەر قالدىرىپ، ونىڭ بولاشاق ماماندىعىن تاڭداۋدا شەشۋشى ءرول اتقاردى.
مەكتەپتى ءتامامداعان سوڭ نارتاي ۇلتتىق ءبىرىڭعاي تەستىلەۋدەن 60-تان جوعارى بالل جيناپ، ءوز ماقساتىنا ءبىر قادام جاقىنداي ءتۇستى. ول جەرگىلىكتى اسكەري ءبولىم ارقىلى ۇلتتىق ۇلان اكادەمياسىنا تۇسۋگە جولداما الىپ، ىرىكتەۋ كەزەڭدەرىنە قاتىسادى. بەلگىلى بولعانداي، اكادەمياعا ءتۇسۋ وڭاي ەمەس: ءاربىر تالاپكەر مەديسينالىق تەكسەرىستەن، پسيحولوگيالىق ىرىكتەۋدەن جانە دەنە شىنىقتىرۋ نورماتيۆتەرىنەن ءساتتى ءوتۋى ءتيىس.
نارتاي ءۇش كەزەڭنەن تۇراتىن بارلىق سىناقتان سۇرىنبەي ءوتىپ، ۇلتتىق ۇلان اكادەمياسىنىڭ كۋرسانتى اتاندى. وسىلايشا، ول بولاشاق وفيسەر بولۋ جولىنداعى العاشقى ناقتى قادامىن جاسادى.
قازىرگى تاڭدا نارتاي 1-كۋرس كۋرسانتى رەتىندە وقۋ مەن اسكەري دايىندىقتى قاتار الىپ ءجۇر. ول ءوزىن وقۋ ۇدەرىسىندە دە، ءتارتىپ پەن جاۋاپكەرشىلىك تۇرعىسىنان دا جاقسى قىرىنان كورسەتىپ كەلەدى. سونىمەن قاتار، سپورتتىق قابىلەتتەرىن شىڭداپ، اكادەميا ومىرىنە بەلسەنە ارالاسۋدا. اسكەري ءتارتىپتى، ۇجىمدىق رۋح پەن بىرلىكتى جوعارى قوياتىن جاس كۋرسانت قاتارلاستارىنا ۇلگى بولا بىلۋدە.
بولاشاق وفيسەر ءۇشىن ءار كۇن – ۇلكەن ءومىر ساباعى. نارتاي ابديماناتوۆ وسى جولدا ءبىلىمىن تەرەڭدەتىپ، اسكەري قىزمەتكە ءتان قاسيەتتەرىن شىڭداۋدا. ول ءۇشىن ۇلتتىق ۇلان اكادەمياسى – تەك ءبىلىم ورداسى عانا ەمەس، ەلگە ادال قىزمەت ەتۋدىڭ العاشقى باسپالداعى.
بۇل جول جەڭىل ەمەس. الايدا تاباندىلىق پەن وتانشىلدىق قاسيەت بار جەردە، نارتاي سىندى جاستار ەل سەنىمىن اقتاپ، تاۋەلسىز قازاقستاننىڭ قورعانى بولارىنا سەنىم مول.
قازاقستان رەسپۋبليكاسى ۇلتتىق ۇلانى اكادەمياسى تۋرالى تولىعىراق اقپاراتتى رەسمي سايت ارقىلى الۋعا بولادى.
https://www.ang.edu.kz/rus/