2023 جىلدان باستاپ ۆەتەريناريا قىزمەتكەرلەرىنىڭ جالاقىسىن كەزەڭ-كەزەڭىمەن ءوسىرۋ جوسپارلانعان.
بۇل جايىندا سەنات دەپۋتاتتارىنىڭ ساۋالىنا ق ر پرەمەر-مينيسترى ءاليحان سمايىلوۆتىڭ جاۋابىندا ايتىلدى، دەپ حابارلايدى Almaty-akshamy.kz قازاقپاراتقا سىلتەمە جاساپ.
«قازىرگى ۋاقىتتا اۋىل شارۋاشىلىعى مينيسترلىگى 55 ءىس-شارادان تۇراتىن ۆەتەريناريا جۇيەسىن رەفورمالاۋ جونىندەگى ۇيىمداستىرۋ ءىس-شارالارىنىڭ جوسپارىن بەكىتتى. وندا وسى ساۋالدا كوتەرىلگەن ۇسىنىستار مەن سالانىڭ پروبلەمالى ماسەلەلەرى دە قامتىلعان. وسىلايشا جوسپار اياسىندا 2023 جىلدان باستاپ ۆەتەريناريا قىزمەتكەرلەرىنىڭ جالاقىسىن كەزەڭ-كەزەڭىمەن ءوسىرۋ كوزدەلگەن.
بۇدان باسقا، ۇكىمەت «بيولوگيالىق قاۋىپسىزدىك تۋرالى» زاڭدى ىسكە اسىرۋ اۋقىمىندا I جانە (نەمەسە) II پاتوگەندى توپتاردىڭ پاتوگەندى بيولوگيالىق اگەنتتەرىمەن جۇمىس ىستەيتىن ۆەتەريناريالىق قىزمەت سالاسىنداعى قىزمەتكەرلەردىڭ جالاقىسىن ۇلعايتۋ بولىگىندە «قازاقستان رەسپۋبليكاسى ۇكىمەتىنىڭ 2015 جىلعى 31 جەلتوقسانداعى № 1193 قاۋلىسىنا وزگەرىستەر ەنگىزۋ تۋرالى» قاۋلى جوباسىن قاراپ جاتىر»، - دەدى ۇكىمەت باسشىسى جاۋابىندا.
سونىمەن قاتار ول ۆەتەريناريا ماماندارىن ازاماتتىق قىزمەتشىلەر ساناتىنا قوسۋعا قاتىستى دا جاۋاپ بەرىپ، مەملەكەتتىك ۆەتەريناريا ۇيىمدارى قازاقستان رەسپۋبليكاسىنىڭ زاڭناماسىندا بەلگىلەنگەن تارتىپپەن مەملەكەتتىك-كوممۋنالدىق كاسىپورىندار نىسانىندا دا، مەملەكەتتىك-كوممۋنالدىق مەكەمەلەر نىسانىندا دا جۇمىس ىستەيتىنىن ايتقان. ونىڭ اتاپ وتۋىنشە، زاڭناماعا سايكەس، مەملەكەتتىك ۆەتەريناريا ۇيىمدارىنىڭ ۆەتەريناريا دارىگەرلەرى جەرگىلىكتى اتقارۋشى ورگاندار ۇيىمدى مەملەكەتتىك-كوممۋنالدىق مەكەمەلەر نىسانىندا قۇرعان جاعدايدا ازاماتتىق قىزمەتشىلەر ساناتىنا جاتقىزىلۋى مۇمكىن.
«بۇگىنگى تاڭدا ۆەتەريناريا سالاسىنداعى ۋاكىلەتتى ورگانعا ۆەتەريناريا دارىگەرىنە جۇكتەمە ءنورماتيۆىنىڭ ۇلگىلىك قاعيدالارىن ازىرلەۋ جانە بەكىتۋ قۇزىرەتىن بەرۋ ماسەلەسى پىسىقتالۋدا»، - دەدى ءاليحان سمايىلوۆ.