كەي وڭىرلەرگە اپتاپ ىستىق قايتا ورالادى

"قازگيدرومەت" رمك سينوپتيكتەرى ەلىمىز بويىنشا 2025 جىلعى 10، 11 جانە 12 شىلدەگە ارنالعان اۋا رايى بولجامىن ۇسىندى، دەپ حابارلايدى aqshamnews.kz

ماماندار باتىستا وتە قاتتى ىستىق بولاتىنىن ەسكەرتەدى.
مەتەورولوگتار تاراتقان اقپاراتقا سايكەس، ەلىمىزدىڭ باتىسىندا جوعارى قىسىم ءورىسىنىڭ اسەرىنەن ىستىق جانە شۋاقتى اۋا رايى كۇتىلەدى، ال قازاقستاننىڭ قالعان اۋماعىندا اتموسفەرالىق فرونتالدى بولىكتەردىڭ جىلجۋى سالدارىنان نايزاعاي ويناپ، جاڭبىر جاۋادى دەپ بولجانادى.

"ەلىمىزدىڭ ورتالىعىندا، 10-11 شىلدەدە وڭتۇستىك-شىعىستا، 11-12 شىلدەدە ەلىمىزدىڭ سولتۇستىگىندە، شىعىسىندا قاتتى جاڭبىر جاۋىپ، بۇرشاق تۇسەدى، داۋىل تۇرادى دەپ كۇتىلەدى. رەسپۋبليكا بويىنشا ەكپىندى جەل سوعادى"، دەلىنگەن "قازگيدرومەت" رمك-نىڭ باسپا ءسوز قىزمەتى تاراتقان اقپاراتتا.

تەمپەراتۋرالىق فونعا كەلەتىن بولساق، اۋا رايىنىڭ قاراما-قايشى قۇبىلىسى ورىن الادى دەپ بولانادى:

كۇندىز رەسپۋبليكامىزدىڭ باتىسىندا، وڭتۇستىك-باتىسىندا 40-44 گرادۋس قاتتى ىستىق بولادى دەپ كۇتىلۋدە؛ سولتۇستىك وڭىردە كۇندىز تەمپەراتۋرا 22-27-دەن 17-23 گرادۋسقا دەيىن تومەندەۋى مۇمكىن؛
شىعىستا تەمپەراتۋرانىڭ نەگىزگى فونى - 20-28 گرادۋس ىستىق؛
وڭتۇستىكتە سىناپ باعانى بىرتىندەپ 25-37-دەن 38-43 گرادۋسقا دەيىن كوتەرىلەدى؛
ەلىمىزدىڭ وڭتۇستىك-شىعىسىندا كۇندىز سىناپ باعاندارى 25-30 گرادۋسقا دەيىن جەتەدى.