KazFoodProducts اگروونەركاسىپتىك حولدينگى EDGE گەندەرلىك تەڭدىك سەرتيفيكاتىن الدى.
قۇجات جەكە سەكتوردا گەندەرلىك ينكليۋزيۆتى جۇمىس ورىندارىن ىنتالاندىرۋ بويىنشا نۇسقاۋلىقتار مەن ستاندارتتاردى بەلگىلەيدى، دەپ حابارلايدى اlmaty-akshamy.kz.
KazFoodProducts كومپانيالار توبى وسى سەرتيفيكاتتاۋدان وتكەن قازاقستانداعى ءبىرىنشى كومپانيا بولدى. ەڭبەكتەگى گەندەرلىك تەڭدىكتىڭ حالىقارالىق ستاندارتتارىنا سايكەستىگى بويىنشا توپ مۇشەلەرى بولىپ سانالاتىن «بايان سۇلۋ» اق، «ازيااگروفۋد» اق، «بيوپەرەيشنس» ج ش س، «EMC agro» ج ش س جانە باسقارۋشى كومپانيا «KazFoodProducts» ج ش س ماراپاتتالدى.
كومپانيا 1998 جىلى قۇرىلعان جانە بۇگىندە قازاقستانداعى جەتەكشى اگروونەركاسىپتىك حولدينگتەردىڭ ءبىرى. حولدينگ 5 مىڭعا جۋىق ادامدى جۇمىسپەن قامتىپ، ىشكى نارىقتا ساتىلاتىن، سونداي-اق برازيليا، اقش، ۇلىبريتانيا، رەسەي، تۇركيا، جۇڭگو جانە ورتالىق ازيا ەلدەرىنە ەكسپورتتالاتىن ءونىم شىعاراتىن 20 ەنشىلەس كاسىپورىننان تۇرادى.
EDGE سەرتيفيكاتىنىڭ يەگەرلەرى اراسىندا ەكونوميكالىق ىنتىماقتاستىق جانە دامۋ ۇيىمى (ەىدۇ)، دۇنيەجۇزىلىك بانك توبى، IFC، يۋنيسەف، ەۋروپالىق قايتا قۇرۋ جانە دامۋ بانكى (ەقدب)، Chevron، IKEA، UniCredit، سياقتى الەمدىك ەكونوميكالىق برەندتەر بار. Deloitte جانە باسقا دا كوپتەگەن حالىقارالىق ۇيىمدار گەندەرلىك تەڭدىكتى ءوز قىزمەتىندەگى باستى باسىمدىق دەپ سانايدى.