كاسپيي جاعالاۋىندا يتبالىقتار ءالى دە قىرىلىپ جاتىر

ماماندار سەبەپتەرىن انىقتاپ جاتىر.

فورت-شيەۆچەنكونىڭ ورتالىق جاعالاۋىندا يتبالىقتاردىڭ ولەكسەلەرى قايتادان تابىلىپ جاتىر، دەپ حابارلايدى Almaty-akshamy.kz Egemen.kz سىلتەمە جاساپ.

18 مامىردا جەرگىلىكتى تۇرعىن فورت-شيەۆچەنكو جاعالاۋىندا سەرۋەندەۋ كەزىندە ءولى يتبالىقتاردى تاپتى.

«ەگەر ءارى قاراي جۇرەتىن بولساق، وندا ءالى دە ءولى يتبالىقتاردى كورەمىز، ويتكەنى ول جاقتا قۇستاردىڭ ءبىر نارسە جەپ جاتقانىن كوردىم»، - دەدى كۋاگەر.

سونداي-اق ول ءتۇپقاراعان اۋدانىنىڭ اكىمدىگىندە قازىرگى يتبالىقتاردىڭ قىرىلۋ سەبەپتەرى انىقتالىپ جاتقانىن اتاپ ءوتتى.

ايتا كەتسەك، كاسپييدە يتبالىقتاردىڭ قىرىلىپ جاتقانى بۇرىن دا بايقالعان ەدى. وسى جىلدىڭ 27 ساۋىرىندە كاسپيي تەڭىزىنىڭ ماڭعىستاۋ بولىگىنىڭ جاعالاۋىن زەرتتەۋ جۇمىستارىن جالعاستىرۋ بارىسىندا ءولى يتبالىقتاردىڭ 94 ۇشاسى تابىلدى. سول كەزدە ەكولوگيا مينيسترلىگىنىڭ بالىق شارۋاشىلىعى كوميتەتى جاعالاۋعا مونيتورينگ جۇرگىزىلىپ جاتقانىن ايتتى. ال 14 مامىردا ماڭعىستاۋ وبلىسىندا 64 ءولى يتبالىق پەن بەس بەكىرە تابىلدى.

«تەڭىز جانۋارلارى مەن بەكىرە بالىقتارىنىڭ ۇشالارى قاتتى ىدىراۋ ساتىسىندا بولدى، سونىڭ سالدارىنان زەرتتەۋ جۇرگىزۋ ءۇشىن تىندەردىڭ سىنامالارىن الۋ مۇمكىن بولمادى. دەمەك ولاردىڭ ءولىمى قىستا بولعان دەپ بولجاۋعا بولادى»، دەدى ەكولوگيا، گەولوگيا جانە تابيعي رەسۋرستار مينيسترلىگىنىڭ باسپا ءسوز قىزمەتى.