كاسىپتىك باعدار بەرۋ – ماڭىزدى قادام

جاستاردى ەڭبەككە باۋلۋ جانە ماماندىقتارىن دۇرىس تاڭداۋعا باعىت بەرۋ – ماڭىزدى ىستەردىڭ ءبىرى. سانالى تۇردە تاڭدالعان ماماندىق جەكە تۇلعانىڭ بولاشاق ومىرىنە اسەر ەتەدى. بولاشاقتاعى كاسىبي ماقساتىنا دۇرىس باعىت العان وقۋشى بويىنداعى قابىلەتىن شىعارماشىلىقپەن دامىتا بىلسە، ساپالى مامان رەتىندە قالىپتاساتىنى بەلگىلى. سول سەبەپتى، قازىرگى تاڭدا وقۋشىلارعا كاسىبي باعدار ۇسىنىپ، كەڭەس ايتۋ ۇلكەن ماڭىزعا يە.

كاسىپتىك باعدار بەرۋ جۇمىسى بۇگىنگى تاڭدا ەڭ كوپ تالقىلاناتىن تاقىرىپ جانە ءجيى كوتەرىلەتىن وزەكتى سۇراقتاردىڭ قاتارىندا. الماتى كوپسالالى كوللەدجىنىڭ ۇجىمى وسىعان وراي اتقارىلاتىن ناقتى شارالاردى انىقتاپ، جوسپارلى تۇردە جۇيەلى جۇزەگە اسىرۋدا. ويتكەنى، ءبىزدىڭ وقۋ ورنىمىز تەحنيكالىق جانە كاسىپتىك ءبىلىم بەرۋگە باعىتتالعان جانە زامان تالابىنا ساي ءتۇرلى ماماندار دايارلايتىن ۇيىمشىل، بىلىكتى مامانداردان قۇرالعان ۇجىم. وقۋ ءبولىمىنىڭ ۇيىمداستىرۋىمەن ءتۇرلى فورماتتا ءىس-شارالار، مەكتەپ وقۋشىلارى اراسىندا ساۋالنامالار وتكىزىلەدى. سولاردىڭ ناتيجەسى بويىنشا ءتىزىم جاسالىپ، كاسىبي ءوزىن-وزى انىقتاۋ باعدارى جۇرگىزىلەدى، كەزدەسۋلەر، ترەنينگتەر، شەبەرلىك سىنىپتارى، ءتۇرلى اكسيالار وتكىزىلەدى. قالا مەكتەپتەرىمەن كەلىسىمشارت ارقىلى تىعىز بايلانىستامىز. وقۋشىلاردىڭ العا قويعان ماقساتتارىن قوعام مۇددەلەرىمەن سايكەستەندىرىپ، ماماندىقتار تۋرالى اقپارات تاراتىلىپ، جاستاردىڭ قىزىعۋشىلىعىن ارتتىرۋ ءۇشىن ولاردىڭ بولاشاق ماماندىقتى دۇرىس تاڭداۋىنا باعىت بەرىلەدى. سونىمەن قاتار، پراكتيكالىق جۇمىس اياسىندا مەكتەپتىڭ 9-سىنىپ وقۋشىلارى الەۋمەتتىك سەرىكتەستەر بازالارىنا ەكسكۋرسياعا جىبەرۋ تاجىريبەسى قالىپتاسقان.

·        تاقىرىپقا وراي

 اسىلحان بەيسەتبايەۆ، الماتى كوپسالالى كوللەدجى ديرەكتورى:

– ءبىلىم نەگىزگى ءرول اتقاراتىن قازىرگى اقپاراتتىق قوعامدا، كوللەدج جەمىستى جەتىستىكتەرگە جەتۋ ءۇشىن وقۋشىلاردىڭ وسكەلەڭ تالابىن قاناعاتتاندىرۋ، رۋحاني بايلىعىن دامىتۋ، تاجىريبەلىك داعدىلارىن جەتىلدىرۋ ماقساتىندا زاماناۋي قۇرال-جابدىقتارمەن جابدىقتالعان قۇزىرەتتىلىك ورتالىعىن ۇسىنادى.

الماتى كوپسالالى كوللەدجى – قازىرگى زاماناۋي تالاپتارعا ساي، جان-جاقتى سۇرانىسقا يە ماماندىق يەلەرىن دايارلايتىن تەحنيكالىق-كاسىپتىك ءبىلىم بەرۋ ورداسى، يننوۆاسيالىق تەحنولوگيانى مەڭگەرۋگە جانە سول ۇردىسپەن وقىتۋعا بارلىق مۇمكىندىكتەر قاراستىرىلعان، قارقىندى دامىپ كەلە جاتقان جانە ۋاقىت تالابىنا بەيىمدەلگەن ءبىلىم بەرۋ مەكەمەسى. كوللەدجىمىزدىڭ باسقا وقۋ وردالارىنان ارتىقشىلىعى دا وسىندا.