جەلتوقسان ايىنىڭ باسىنان بەرى ەلىمىزدىڭ وڭىرلەرىندە 250-دەن استام اۋىل شارۋاشىلىعى جارمەڭكەسى ۇيىمداستىرىلىپ، وعان ميلليونعا جۋىق ازامات قاتىستى، دەپ حابارلايدى aqshamnews.kz
بۇل تۋرالى نەگىزگى ازىق-تۇلىك ونىمدەرىنىڭ باعاسىن تۇراقتاندىرۋ جونىندەگى كەڭەستە ۆيسە-پرەمەر سەرىك ءجۇمانعاريننىڭ توراعالىعىمەن وتكەن جيىندا مالىمدەلدى. ساۋدا جانە ينتەگراسيا ءبىرىنشى ۆيسە-مينيسترى ايجان بيجانوۆانىڭ ايتۋىنشا، جارمەڭكەلەر تۇرعىندار اراسىندا ۇلكەن سۇرانىسقا يە بولىپ، ۇسىنىلعان ونىمدەر تولىقتاي ساتىلىپ جاتىر.
«ەڭ كوپ ساتىلعان ونىمدەردىڭ قاتارىندا كارتوپ كوش باستاپ تۇر: قاراعاندى وبلىسىندا – 110 توننا، الماتىدا – 90 توننا، ال شىمكەنتتە مەرەكەلىك دەمالىس كۇندەرى 45 توننا كارتوپ ساتىلدى»، – دەدى ءبىرىنشى ۆيسە-مينيستر.
سونىمەن قاتار، جارمەڭكەلەرمەن بىرگە ساۋدا سورەلەرىنە تۇراقتاندىرۋ قورلارىنان كوكونىستەر شىعارىلىپ جاتىر. اۋىل شارۋاشىلىعى ۆيسە-مينيسترى ەرمەك كەنجەحان ۇلىنىڭ دەرەگىنشە، 19 جەلتوقسان كۇنگى مالىمەت بويىنشا، تۇراقتاندىرۋ قورلارىنان 9،2 توننا كارتوپ، 2،6 توننا ءسابىز، 2،8 توننا پياز جانە 2،1 توننا قىرىققابات ساتىلعان. الداعى مامىر ايىنا دەيىن كوكونىستەردى ساتۋ كەستەسى وڭىرلەردىڭ قاجەتتىلىگىن ەسكەرە وتىرىپ جاسالدى.
اپتا قورىتىندىسى بويىنشا الەۋمەتتىك ماڭىزى بار ازىق-تۇلىك ونىمدەرىنىڭ باعاسى 0،1%-عا ءوستى، ال جىل باسىنان بەرى بۇل كورسەتكىش 1،1%-دى قۇرادى.
كەڭەس سوڭىندا سەرىك جۇمانعارين جارمەڭكەلەردى ودان ءارى بەلسەندى وتكىزۋدى جانە مەرەكە قارساڭىندا باعانىڭ نەگىزسىز وسۋىنە جول بەرمەۋ ءۇشىن ساۋدا سالاسىندا مەملەكەتتىك باقىلاۋدى كۇشەيتۋدى تاپسىردى.