كارديولوگيا جانە ىشكى اۋرۋلار عىلىمي-زەرتتەۋ ينستيتۋتى «كارديوحيرۋرگيا (ەرەسەكتەر، بالالار)» ماماندىعى بويىنشا رەزيدەنتۋرا باعدارلاماسىنىڭ حالىقارالىق اككرەديتتەۋىنەن ءساتتى ءوتىپ، سەرتيفيكاتىن يەلەندى.
اككرەديتتەۋ تۋرالى كۋالىكتى ءبىلىم بەرۋ مەن دەنساۋلىق ساقتاۋ سالاسىنداعى ساپانى قامتاماسىز ەتۋ جونىندەگى ەۋرازيالىق اككرەديتتەۋ ورتالىعى (ەاو) تابىستادى. ەاو اككرەديتتەۋ كەڭەسى باعدارلامانىڭ جوعارى وقۋ ورنىنان كەيىنگى مەديسينالىق ءبىلىم بەرۋ ستاندارتتارىنا سايكەستىگىن راستادى. كۋالىك 5 جىل مەرزىمگە جارامدى.
ساراپشىلار ينستيتۋتتىڭ ينفراقۇرىلىمىمەن جانە ماتەريالدىق-تەحنيكالىق جابدىقتالۋىمەن، كادرلىق قۇرامىمەن، وقۋ-ادىستەمەلىك قامتاماسىز ەتىلۋىمەن، ءبىلىم بەرۋ پروسەسىنىڭ اقپاراتتىق رەسۋرستارىمەن، سونداي-اق كومپيۋتەرلىك جانە باعدارلامالىق قامتاماسىز ەتىلۋىمەن تانىستى. وقىتۋشىلاردىڭ قۇزىرەتتىلىگىنە، رەزيدەنتتەردىڭ كلينيكالىق دايارلىعىنىڭ ساپاسىنا باعا بەرىلدى. كلينيكالىق بازالاردىڭ رەزيدەنتتەردىڭ وقۋ پروسەسىن تولىق قامتاماسىز ەتۋگە بارلىق مۇمكىندىگى بار ەكەنى اتاپ ءوتىلدى.
«ينستيتۋتتىڭ ءبىلىم بەرۋ قىزمەتى ەلىمىزدىڭ دەنساۋلىق ساقتاۋ جۇيەسى ءۇشىن جوعارى بىلىكتى جانە باسەكەگە قابىلەتتى كادرلاردى دايارلاۋعا باعىتتالعان. ينستيتۋتتا ءبىلىم الۋشىلاردىڭ بارلىق ساناتىن دايارلاۋ جانە قايتا دايارلاۋ ءۇشىن قاجەتتى بارلىق مۇمكىندىك بار. پروفەسسور-وقىتۋشىلار قۇرامىنىڭ كادرلىق الەۋەتىنىڭ جوعارى دەڭگەيى – ينستيتۋتتىڭ باسەكەگە قابىلەتتىلىگىنىڭ نەگىزگى فاكتورلارىنىڭ ءبىرى»، – دەيدى اتالعان ينستيتۋتتىڭ باسقارما ءتوراعاسى رۇستەم تولەۋتايەۆ.
ساراپشىلار جۇمىس بەرۋشىلەرمەن جانە رەزيدەنتۋرا تىڭداۋشىلارىمەن سۇحبات جۇرگىزىپ، ينستيتۋتتىڭ ءبىلىم بەرۋ باعدارلامالارى بويىنشا دايارلىق ساپاسىنا جانە ءبىلىم الۋشىلاردىڭ كاسىبي ءبىلىم الۋ دەڭگەيىنە جوعارى باعا بەردى. جۇمىس بەرۋشىلەردىڭ پىكىرىنشە، ينستيتۋت رەزيدەنتۋراسىنىڭ تۇلەكتەرى تەوريالىق جانە پراكتيكالىق بىلىمدەرى مەن داعدىلارىنىڭ جوعارى دەڭگەيىن كورسەتەدى. تۇلەكتەردى جۇمىسقا ورنالاستىرۋ كورسەتكىشى جىل سايىن 100 پايىزدى قۇرايدى.
دارىگەردىڭ كاسىبي قىزمەتىنىڭ تابىستىلىعى كوپ جاعدايدا وقۋ كەزەڭىندە رەزيدەنت جۇمىس ىستەيتىن كلينيكالىق بولىمشەلەرىنىڭ ۇجىمدارىنداعى قولايلى احۋالعا بايلانىستى. ءبىلىم بەرۋ باعدارلامالارىن ىسكە اسىرۋ كاسىبي ءبىلىم الۋعا جانە ءبىلىم الۋشىنىڭ ەڭبەك قىزمەتىنە دايىن بولۋىنا ىقپال ەتەدى.