سوڭعى كۇندەردە ەلىمىزدە ادام قيالىنا دا كىرمەگەن وقيعالار ورىن الۋدا. بەلگىلى بولا باستاعانىنداي، شەتەلدەردە ارنايى دايىندىقتان وتكەن سودىرلار قارۋ-جاراقپەن ەلىمىزگە كىرىپ الىپ، كوپتەگەن وڭىرلەردە ءبىر مەزگىلدە كادىمگىدەي مايدان ۇيىمداستىردى.
قازاقستاننىڭ 30 جىلدا جەتكەن جەتىستىگىن كورە الماعان ىشكى جانە سىرتقى جاۋلار وسىنداي ارەكەتكە باردى. قانداي سەبەپتى جەلەۋ ەتسە دە، مۇنداي قىلمىس اقتاۋعا كەلمەيدى. مەملەكەت باسشىسى قاسىم-جومارت كەمەل ۇلى توقايەۆ دەر كەزىندە باتىل شەشىم قابىلداپ، ەلىمىزدى، تاۋەلسىزدىگىمىزدى امان الىپ قالا ءبىلدى. وكىنىشكە وراي، باتىستاعى كەيبىر ۇيىمدار بالاڭدى تالاعان ءيتتى ولتىرسەڭ دە، جانۋارعا قاتىگەزدىك تانىتتى دەپ باعالايدى. قارۋمەن ەلگە كىرىپ، بەيبىت ادامدارعا وق اتقان ادامدارمەن كەلىسسوز جۇرگىزۋدى ۇسىنادى. پرەزيدەنت ايتقانداي، «سودىرلارمەن قانداي كەلىسسوز بولۋى مۇمكىن؟».
پرەزيدەنتتىڭ ەل تىنىشتىعى مەن تاۋەلسىزدىگىنە ءقاۋىپ تونگەن شاقتا ۇجىمدىق قاۋىپسىزدىك شارتتارى ۇيىمىنا مۇشە مەملەكەتتەر باسشىلارىنان كومەك سۇراۋى ورىندى دەپ ويلايمىن. تەرروريزمگە قارسى وپەراسيا بارىسىندا قازا تاپقان اسكەريلەردى اللا راحىمىنا بولەسىن! ولار ءوز وتانىن قورعاۋ جولىندا شەيىت بولدى. 10 قاڭتاردى جالپىۇلتتىق ازا تۇتۋ كۇنى دەپ بەلگىلەۋ سول بوزداقتار رۋحىنا حالىقتىڭ، مەملەكەتتىڭ قۇرمەتىن بىلدىرەدى. مەملەكەت وزىمىزگە عانا كەرەك. سوندىقتان، جاستارعا ايتارىم، ارانداتۋلارعا ەرمەي، ۇلت ءۇشىن، مەملەكەت ءۇشىن قىزمەت ەتۋ قاجەت! ءقازىر قالانى قالىڭ تۇمان باسىپ تۇر. دەگەنمەن تۇمان سەيىلىپ، كۇن شىعادى. سىن ساعاتتارى دا ءوتىپ، جايدارلى كەزەڭگە دە جەتەمىز. بۇل ءۇشىن پرەزيدەنتىمىزدىڭ اينالاسىنا جۇدىرىقتاي جۇمىلۋعا ءتيىسپىز.