باعا نەگە ءوستى
جىلىتۋ ماۋسىمى قارساڭىندا كومىر تاعى 7 پروسەنتكە قىمباتتادى، دەپ حابارلايدى Almaty-akshamy.kz حابار 24 سىلتەمە جاساپ.
ەنەرگەتيكا ۆيسە-مينيسترى جاندوس نۇرماعانبەتوۆ وسىلاي دەدى. باعانىڭ وسۋىنە نە اسەر ەتتى؟
"قازاقستان تەمىر جولى" جەلىسى ارقىلى كومىر ەكسپورتى 12%-كە ءوستى. ءسويتىپ، 7 ايدا ەلىمىز 20 ملن تونناعا جۋىق قاتتى وتىندى شەكارا اسىردى. ونىڭ دەنى رەسەي، ورتالىق ازيا جانە ەۋروپا ەلدەرىنە باعىتتالعان. كومىردى ەل ىشىندە تاسىمالداۋ 1،5 پروسەنتكە ارتقان.
ونىڭ 37 ملن تونناسى جەو-نا، 5 ملن توننادان استامى حالىققا جونەلتىلدى. بۇل بىلتىرعىدان 26 پروسەنتكە كوپ. جالپى العاندا ۇلتتىق كومپانيا جەلىلەرى ارقىلى 62 ملن توننا كومىر تاسىمالدانعان.
ياعني وتكەن جىلدىڭ سايكەس كەزەڭىمەن سالىستىرعاندا 4،6%-كە ارتىق. ەكونوميكا ءۇشىن اۋىز تولتىرىپ ايتارلىقتاي كورسەتكىش، ءبىراق قاراپايىم حالىققا كومىر باعاسى قولجەتىمدى ەمەس.
ەنەرگەتيكا ۆيسە-مينيسترى جاندوس نۇرماعانبەتوۆتىڭ سوزىنشە، تەمىر جولدار بويىنشا وتىندى جەتكىزۋ جىل باسىنان بەرى، ورتاشا العاندا، 5%-كە قىمباتتاپتى.
بيىل ەلدە كومىر قۇنى 30 پروسەنتكە وسكەن. تامىزدىڭ باسىندا عانا باعا 7%-كە كوتەرىلدى. ونىڭ ۇستىنە ەنەرگيا ءوندىرۋشى كاسىپورىنداردىڭ كەيبىرى شەكتى ءتاريفتى تاعى دا ءوسىرۋدى سۇراۋدا. بۇل دا باعاعا ىقپال ەتەرى حاق.
يندۋستريا جانە ينفراقۇرىلىمدىق دامۋ مينيسترلىگى الەۋمەتتىك كومىردى ارتتىرۋ ارقىلى ماسەلەنى رەتتەۋگە ۋادە بەردى. جالپى ەلدە جىلىتۋ ماۋسىمىنا دايىندىق ەرتە باستالدى. قويمالارعا 7 پروسەنتكە كوپ كومىر جينالعان.
ءونىمنىڭ 10 پروسەنتى بيرجاعا شىعارىلادى. كەلەشەكتە ونىڭ ۇلەسىن 50 پروسەنتكە جەتكىزۋ كوزدەلەدى. بۇل دەلدالداردىڭ ارالاسۋىن تەجەيتىن باستاما دەيدى ماماندار.
«ءقازىر ءبىزدىڭ مينيسترلىك پريكاز جاساپ جاتىرمىز. ياعني اۆتوموبيلدىك ترانسپورتقا شەكتەۋ. ياعني الەۋمەتتىك كومىردىڭ باسقا ەلگە شىقپاس ءۇشىن. ءبىز الدىن الا ۇلتتىق كاسىپكەرلىك پالاتاسىمەن كەلىسىپ جاتىرمىز. ياعني بۇل بيزنەسكە نۇقسان كەلە مە، كەلمەي مە جالپى؟ ياعني وسى كومىر شىعاراتىن، تاسيتىن كاسىپورىندارعا كەسىرى تيمەۋ كەرەك. اتقارىلىپ جاتقان جۇمىستار وسى. ءبىز مۇمكىندىگىنشە بۇگىن ۇسىنىستى كوپ جاساپ جاتىرمىز. ياعني سول ۋاقىتتا كوپ كولەمدە، قويمالاردا كومىر بولاتىن بولسا، ونىڭ باعاسى وسپەيدى دەگەنگە كەلتىرەدى»،- دەيدى ييدم يندۋستريالىق دامۋ كوميتەتى ءتوراعاسىنىڭ ورىنباسارى تۇرار جولماعامبەتوۆ.