قازاقستاندىقتار جىلجىمايتىن مۇلىككە اۋىرتپالىقتاردى ونلاين تىركەۋدى ءجون كورەدى.
وتكەن جىلمەن سالىستىرعاندا "Blockchain" تەحنولوگياسى ارقىلى جاسالاتىن مامىلەلەر سانى 2،5 ەسەگە ارتتى. 2024 جىلدىڭ ءبىرىنشى توقسانىندا شامامەن 25 مىڭ وپەراسيا جاسالدى، دەپ حابارلايدى اlmaty-akshamy.kz.
بۇگىنگى كۇنى ەكىنشى دەڭگەيلى بانكتەردىڭ پلاتفورمالارى ارقىلى كەپىلدى (قايتا كەپىلگە قويۋدى) جانە ونىڭ توقتاتىلۋىن ونلاين رەجيمدە تىركەۋگە بولادى. ايتا كەتەيىك، بۇل قىزمەت استانا، الماتى جانە شىمكەنت قالالارىندا، سونداي-اق تۇركىستان، قاراعاندى جانە الماتى وبلىستارىندا سۇرانىسقا يە.
سونىمەن قاتار، مەملەكەتتىك كورپوراسيا قارىز شارتى بويىنشا تالاپ ەتۋ قۇقىقتارىن باسقاعا بەرۋدى جانە شارت تالاپتارىنىڭ وزگەرۋى ناتيجەسىندە اۋىرتپالىقتاردىڭ وزگەرۋىن تىركەۋ مۇمكىندىگىن ىسكە اسىردى. بۇعان قوسا، تۇرعىن ەمەس ۇي-جايلارمەن كەپىلدى تىركەۋ دە قولجەتىمدى بولدى.
ايتا كەتەرلىگى، Blockchain تەحنولوگياسى بانكتەردىڭ جىلجىمايتىن مۇلىكتى كەپىلگە الۋ ارقىلى نەسيە بەرۋ كەزىندەگى نەسيەلەردى ونلاين راسىمدەۋدى جەڭىلدەتەدى، شىعىنداردى ازايتادى جانە وتىنىمدەردى قاراۋ مەرزىمدەرىن قىسقارتادى. سونىمەن، Blockchain پاتەردى راسىمدەۋ ۋاقىتىن 3 كۇننەن 1 ساعاتقا دەيىن قىسقارتتى.