جىلدىڭ ۇزدىك سپورتشىسى مەن جاتتىقتىرۋشىسى انىقتالدى

استانادا ق ر تۋريزم جانە سپورت مينيسترلىگىنىڭ ۇيىمداستىرۋىمەن جىل سايىنعى «ۇزدىك-2024» سىيلىعىنىڭ جەڭىمپازدارىن ماراپاتتاۋ ءىس-شاراسى ءوتتى، دەپ حابارلايدى aqshamnews.kz

سالتاناتتى جيىنعا ق ر پارلامەنتىنىڭ دەپۋتاتتارى، وليمپيادا جەڭىمپازدارى مەن جۇلدەگەرلەرى، الەم بىرىنشىلىكتەرى مەن حالىقارالىق جارىستاردىڭ جەڭىمپازدارى مەن جۇلدەگەرلەرى، سپورت جۋرناليستەرى قاتىستى.

تۋريزم جانە سپورت ءمينيسترى ەربول مىرزابوسىنوۆ 2024 جىل وتاندىق سپورت ءۇشىن ەرەكشە جىل بولعانىن اتاپ ءوتتى. قازاقستاندىق سپورتشىلار بيىل حالىقارالىق ءىرى جارىستاردا تابىستى ناتيجە كورسەتسە، ەلىمىزدە ءىرى جارىستار ۇيىمداستىرىلدى.

«بيىلعى جىلدىڭ باستى دوداسى پاريج وليمپياداسى مەن پاراليمپيادا بولعانى انىق. ءبىزدىڭ قۇراما تاريحي جەتىستىكتەرگە قول جەتكىزدى. دزيۋدوشى ەلدوس سمەتوۆ وليمپيادا چەمپيونى اتاندى. بۇل – تاۋەلسىز قازاقستان تاريحىندا دزيۋدودان بۇيىرعان العاشقى التىن مەدال. گيمناستيكادان العاش رەت وليمپيادا مەدالىن جەڭىپ الدىق. ول جۇلدە ناريمان قۇربانوۆقا بۇيىردى. داۆيد دەگتياريەۆ پارا-پاۋەرليفتينگتەن ەكى دۇركىن پاراليمپيادا چەمپيونى اتاندى. پارا-دزيۋدوشى اقمارال ناۋاتبەك وليمپيادا شىڭىن باعىندىردى»، – دەدى مينيستر.

سونىمەن قاتار بيىل استانادا 5ء-شى دۇنيەجۇزىلىك كوشپەندىلەر ويىنى ۇيىمداستىرىلدى. كوشپەندىلەر دوداسىنا 89 ەلدىڭ سپورتشىلارى قاتىستى. قازاقستان قۇراماسى جالپىكوماندالىق ەسەپتە توپ جاردى.

«مەملەكەت باسشىسى قاسىم-جومارت كەمەل ۇلى توقايەۆتىڭ قولداۋىمەن سپورت سالاسىندا وڭ وزگەرىستەر باستالدى. كەلەسى جىلى وتاندىق سپورتشىلاردى بىرنەشە بايراقتى باسەكە كۇتىپ تۇر. 2025 جىلدىڭ اقپان ايىندا سپورتشىلارىمىز قىتايدىڭ حاربين قالاسىندا وتەتىن قىسقى ازيا ويىندارىنا قاتىسىپ، قىسقى وليمپيادا ليسەنزياسى ءۇشىن سىنعا تۇسەدى. تاريح قويناۋىنا ەنىپ بارا جاتقان 2024 جىلى سپورتشىلارىمىز جامان ناتيجە كورسەتكەن جوق، جاڭا جىلدان ودان دا ۇلكەن جەڭىستەر كۇتەمىز»، – دەدى ەربول مىرزابوسىنوۆ.

جىل قورىتىندىسى بويىنشا «ۇزدىك» دەپ تانىلعاندار:

ەلدوس سمەتوۆ، داۆيد دەگتياريەۆ – «جىلدىڭ ۇزدىك سپورتشىسى»؛

عالىمجان جىلگەلدييەۆ، يۋريي كولەسنيكوۆ – «جىلدىڭ ۇزدىك جاتتىقتىرۋشىسى»؛

گرەك-ريم، ەركىن جانە ايەلدەر كۇرەسى فەدەراسياسى – «جىلدىڭ ۇزدىك اككرەديتتەلگەن سپورت فەدەراسياسى»؛

قۋانىشبەك ەسەكەيەۆ، قازاقستان دزيۋدو فەدەراسياسىنىڭ پرەزيدەنتى – «جىلدىڭ ۇزدىك اككرەديتتەلگەن سپورت فەدەراسياسىنىڭ پرەزيدەنتى»؛

ەركەبۇلان ءىلياسوۆ، «جامبى اتۋ فەدەراسياسى» رقب پرەزيدەنتى – «ۇزدىك سپورت مەسەناتى»؛

Kaz Minerals - «ۇزدىك سپورت مەسەناتى»؛

عيزات تۇسىپايەۆ – «جىلدىڭ ۇزدىك اۋىل جاتتىقتىرۋشىسى»؛

ەرلان تاسبولاتوۆ – «اۋىلدىق جەردەگى ۇزدىك دەنە شىنىقتىرۋ جانە سپورت ادىسكەرى»؛

دارحان شاريعاتوۆ – «اۋىلدىق جەردەگى ۇزدىك دەنە شىنىقتىرۋ جانە سپورت نۇسقاۋشىسى»؛

ماقات اۋداندىق مادەنيەت، تىلدەردى دامىتۋ، دەنە شىنىقتىرۋ جانە سپورت ءبولىمى – «اۋداندىق ۇزدىك دەنە شىنىقتىرۋ جانە سپورت ءبولىمى»؛

الماتى قالاسىنداعى «جوعارى سپورت شەبەرلىگى مەكتەبى» – «جىلدىڭ ۇزدىك سپورت ۇيىمى»؛

جامبىل وبلىسى اكىمدىگىنىڭ دەنە شىنىقتىرۋ جانە سپورت باسقارماسى – «ۇزدىك سپورتتىق ءوڭىر»؛

يليا ميزەرنىح – «جاس جانە جاسوسپىرىمدەر قۇرامىنداعى سپورتشى»؛

سەرگەي سەرگەيەۆ – «جىلدىڭ ۇزدىك بالالار جاتتىقتىرۋشىسى»؛

نادەجدا كيم – «دەنە شىنىقتىرۋ جانە سپورت سالاسىنداعى ۇزدىك مامان»؛

اقمارال ناۋاتبەك – «سپورتتا ۇزدىك سەرپىن»؛

جاندوس ايتباي ۇلى («حابار» تەلەارناسى)، قۋانىش نۇردانبەك ۇلى («ەگەمەن قازاقستان» گازەتى)، نازەركە سۇلتانبەك («Sport+» سايتى) – سەيداحمەت بەردىقۇلوۆ اتىنداعى سىيلىقتىڭ لاۋرەاتتارى.